ორ თვეზე მეტი გავიდა მას შემდეგ, რაც დანით შეიარაღებულმა პირმა ტეილორ სვიფტის თემატური ცეკვის კლუბში სამი ბავშვი მოკლა და კიდევ რამდენიმე დაჭრა. ტრაგედიის მსხვერპლთა პატივსაცემად საუთპორტს პრინცი უილიამი და ქეით მიდლტონი ეწვივნენ.
ჟურნალ People-ის ინფორმაციით, წყვილი დაღუპულთა ოჯახის წევრებს პირადად შეხვდა. სამეფო ოჯახის წევრები ასევე შეხვდნენ ცეკვის კლუბის მასწავლებელს, რომელიც თავდასხმის დროს ადგილზე იმყოფებოდა. ამ შემთხვევისას რვა ბავშვი და ორო ზრდასრული ადამიანი დაშავდა. პოლიციამ 17 წლის ახალგაზრდა კაცი დააკავა, რომელიც დანით იყო შეიარაღებული.
უელსის პრინცმა და პრინცესამ ასევე ისაუბრეს საუთპორტის პირველადი რეაგირების ჯგუფთან, რომელიც პირველები გამოცხადდა დანაშაულის ადგილას.
„გულითად მადლობას გიხდით საუთპორტის მოსახლეობას თქვენს გამოცდილებაზე საუბრისა და გარდაცვლილი ახალგაზრდების პატივისცემისთვის. ტრაგედიისას საზოგადოების სიძლიერე და გამძლეობა ჩვენ გვახსენებს იმ კავშირებს, რომლებიც გვაერთიანებს,”- წერია უილიამისა და ქეითის ოფიციალურ ინსტაგრამზე. პოსტს წყვილის ვიზიტის ამსახველი ვიდეოც ახლავს. ეს იყო მიდლტონის პირველი საჯარო გამოჩენა მას შემდეგ, რაც სექტემბერში განაცხადა, რომ ქიმიოთერაპიის კურსი დაასრულა. ექვსი თვით ადრე პრინცესამ გაამხილა, რომ მას კიბოს დიაგნოზი დაუსვეს და მკურნალობას გადიოდა.
სამეფო წყვილის ვიზიტამდე საუთპორტში სვიფტმაც მიაგო პატივი გარდაცვლილთა ხსოვნას. ის აგვისტოში ლონდონში თავისი Eras Tour-ის კონცერტზე კულისებში შეხვდა თავდასხმის შედეგად დაზარალებულ ოჯახებს. ივლისში, პოპ ვარსკვლავმა ინსტაგრამზე დაწერა, რომ ამ ტრაგედიის გამო „სრული შოკი ჰქონდა”.
„უდანაშაულოთა სიცოცხლის დაკარგვა და საშინელი ტრავმა, რომელიც ყველას ეხება – ოჯახებსა და პირველადი რეაგირების თანამშრომლებს. ისინი უბრალოდ
ბავშვები იყვნენ საცეკვაო გაკვეთილზე. სიტყვებს ვერ ვპოულობ, რომ ჩემი თანაგრძნობა გადმოვცე ამ ოჯახების მიმართ,” – განაცხადა სვიფტმა.
