როგორც ტელეკომპანია CNN იტყობინება, ცნობილი ბენდის, One Direction-ის ყოფილი ვარსკვლავი ლიემ პეინი ოთხშაბათს, 16 ოქტომბერს 31 წლის ასაკში გარდაიცვალა.
სახელმწიფო პოლიციის ინფორმაციით, ის არგენტინის დედაქალაქ ბუენოს-აირესში, სასტუმროს მესამე სართულიდან გადმოვარდა. პოპ-ვარსკვლავის გარდაცვალებამდე ადგილობრივ პოლიციაში ზარი შევიდა სასტუმროში მყოფი აგრესიული მამაკაცის შესახებ. დამატებითი ინფორმაცია ლიემ პეინის გარდაცვალების შესახებ ამ ეტაპზე ცნობილი არ არის.
„ბილბორდი“ მუსიკოსის წარმომადგენლებს დამატებითი ინფორმაციის მისაღებად დაუკავშირდა.
ლიემ პეინი ბრიტანული ბოი-ბენდის, One Direction-ის წევრი იყო, რომლის შემადგენლობაშიც ასევე იყვნენ ჰარი სტაილსი, ზეინ მალიკი, ლუის ტომლინსონი და ნაილ ჰორანი. ჯგუფი 2010 წელს ჩამოყალიბდა. One Direction-მა ოთხი წარმატებული მსოფლიო ტურის ფარგლებში 300-ზე მეტი შოუ გამართა. მათი ალბომი ბილბორდ 200-ში ნომერ პირველ ალბომად დასახელდა, ბილბორდ 100-ში კი ტოპ ათეულში მათი ექვსი ჰიტი მოხვდა. ბენდმა კარიერის განმავლობაში MTV Video Music Awards-ის ჯილდო ოთხჯერ მიიღო.
2015 წლის შემდეგ ბენდმა მუსიკალური პაუზა აიღო. ლიემ პეინმა სოლო კარიერა 2017 წელს, Quavo-სთან ერთად შესრულებული სიმღერით, Strip That Down-ით დაიწყო. 2018 წლის აგვისტოში მან პირველი სოლო EP გამოსცა, სახელწოდებით Fast Time. მისი სადებიუტო ალბომი, LP1, 2019 წლის დეკემბერში გამოვიდა.
2021 წელს, ლაიმ პეინმა ალკოჰოლზე დამოკიდებულების პრობლემებზე პოდკასტ Diary of a CEO-ში ისაუბრა. მუსიკოსმა დეპრესიასა და დამოკიდებულებასთან ბრძოლის პერიოდი გაიხსენა, თუმცა 2023 წელს განაცხადა, რომ აღარ იყო ალკოჰოლზე დამოკიდებული: „ყველაფერი ძალიან, ძალიან კარგადაა. მე ახლა 100 დღეზე მეტია სუფთა ვარ და თავს საოცრად ვგრძნობ. ძალიან კარგად ვარ და გულშემატკივრების მხარდაჭერასაც ვგრძნობ. ამიტომ, სუპერ ბედნიერი ვარ.“ — ამბობდა ლიემ პეინი პრობლემის დაძლევის შემდეგ.
2023 წლის აგვისტოში ის ჯანმრთელობის პრობლემების გამო საავადმყოფოში მოხვდა და სამხრეთ აფრიკის ტურნეს თარიღების გადაწევა მოუხდა.
სამწლიანი პაუზის შემდეგ ლიემ პეინმა 2024 წლის მარტში პირველი ახალი სიმღერა გამოსცა, სახელწოდებით Teardrops, რომელიც NSYNC-ის წევრ JC Chasez-თან ერთად დაწერა.
გარდაცვალებამდე რამდენიმე კვირით ადრე, 2 ოქტომბერს, ლიემ პეინი ბუენოს-აირესში შეამჩნიეს, სადაც ვარსკვლავი One Direction-ის ყოფილი წევრის, ნაილ ჰორანის კონცერტს ესწრებოდა.
