ჩრდილოეთ ამერიკის ერთ-ერთი ყველაზე აღიარებული მუსიკალური ფესტივალი, Pitchfork Music Festival 2025, ორგანიზატორების გადაწყვეტილებით ჩიკაგოში აღარ ჩატარდება.
ფესტივალის წარმომადგენლებმა სოციალურ ქსელში და ვებგვერდზე შემდეგი ინფორმაცია გამოაქვეყნეს: „რადგან მუსიკალური ფესტივალების გარემო სწრაფად იცვლება, რთული გადაწყვეტილება მივიღეთ და 2025 წელს Pitchfork Music Festival ჩიკაგოში აღარ გაიმართება.“
„ეს გადაწყვეტილება მარტივად არ მიგვიღია. 19 წლის განმავლობაში Pitchfork Music Festival მუსიკის, ხელოვნებისა და საზოგადოების ზეიმი იყო. სივრცე, სადაც იქმნებოდა მოგონებები, სადაც მუსიკის სიყვარული ყველას გვაერთიანებდა. მიუხედავად იმისა, რომ ფესტივალი Pitchfork-ის რედაქციის გემოვნებას შეესაბამებოდა, ის ყოველთვის იყო კოლაბორაციული ძალისხმევის შედეგი და, როგორც ჩიკაგოს ხელოვნების სცენის მნიშვნელოვანი საყრდენი საკუთარი ცხოვრებით აგრძელებდა არსებობას, “ – აღნიშნულია განცხადებაში.
„გვინდა უდიდესი მადლიერება გამოვხატოთ ქალაქ ჩიკაგოსადმი, რომელიც თითქმის ორი ათწლეულის განმავლობაში Pitchfork Music Festival-ის სახლად იქცა. მადლობას ვუხდით არტისტებს, რომლებმაც ჩვენს სცენაზე დაუვიწყარი კონცერტები გამართეს, გულშემატკივრებს, რომლებიც ყოველ წელს უდიდესი ენერგიით გვმუხტავდნენ. განსაკუთრებული მადლობა At Pluto-სა და ფესტივალის სხვა შემოქმედებით გუნდს, რომელთა ერთგულება და ძალისხმევა თითოეული ღონისძიების მთავარი ხერხემალი იყო, მადლობა მთელ საზოგადოებას და მაიკ რიდს, რომელმაც ფესტივალი ამ უნიკალური ხედვით დააფუძნა”.
„Pitchfork 2025 წელს კვლავ განაგრძობს სხვადასხვა ღონისძიების ორგანიზებას. ველით, რომ მომავალშიც შევქმნით სივრცეებს, სადაც მუსიკა, კულტურა და საზოგადოება ერთმანეთს პოზიტიურ და ამაღლებულ გარემოში შეხვდება. იმედს ვიტოვებთ, რომ სწორედ იქ გიხილავთ“. – აღნიშნეს ორგანიზატორებმა ტექსტის დასკვნით ნაწილში.
Pitchfork Music Festival-ის ისტორია 2005 წელს, Intonation Music Festival-იდან იწყება, სადაც ადგილობრივმა ორგანიზატორებმა Skyline Chicago-მ Pitchfork Media-ს, ჩიკაგოს Union Park-ში პირველი ღონისძიების კურატორობა სთხოვეს. მიუხედავად იმისა, რომ Intonation Music Festival-ი 2006 წელს კვლავ გაიმართა, Pitchfork Media-მ Pitchfork Music Festival-ის სახელით საკუთარი ღონისძიების შექმნა გადაწყვიტა.
წლების განმავლობაში, ფესტივალზე არაერთი აღიარებული არტისტი გამოსულა, მათ შორის: Animal Collective, Godspeed You! Black Emperor, Slint, Björk, Wilco, A Tribe Called Quest, The Isley Brothers და სხვა. COVID-19 პანდემიის გამო 2020 წლის ღონისძიება გაუქმდა, თუმცა 2021 წელს ფესტივალი კვლავ დაბრუნდა და წლევანდელი ღონისძიება ივლისში ჩატარდა, სადაც მთავარ შემსრულებლებად Jamie xx, Alanis Morissette და Black Pumas წარდგნენ.
Pitchfork ფესტივალი დროთა განმავლობაში საერთაშორისო მასშტაბით გაფართოვდა: 2011-2022 წლებში პარიზში, 2021-2023 წლებში ლონდონში, 2020-2022 წლებში ბერლინში, ხოლო წელს მექსიკის დედაქალაქ მეხიკოში ჩატარდა.
Pitchfork Music Festival-ის შეჩერების შესახებ ინფორმაცია მას შემდეგ გავრცელდა, რაც გლობალურმა მედია კომპანია Condé Nast-მა იანვარში თანამშრომლების შემცირების შესახებ გამოაცხადა.
