თუ ჯგუფის დამფუძნებელ გიტარისტ The Edge-ს დავუჯერებთ, U2-ს მომავალი ალბომი შესაძლოა სრულიად განსხვავებული ჟღერადობის იყოს. ვეტერანმა გიტარისტმა BBC რადიო 2-ში სტუმრობისას ჯგუფის ბოლო ჩანაწერზე How to Re-Assemble an Atomic Bomb ისაუბრა, რომელიც 2004 წლის ალბომის, How to Dismantle an Atomic Bomb-ის 20 წლის იუბილეზე გამოდის და აქამდე გამოუცემელ კომპოზიციებს აერთიანებს.
საუბრისას The Edge-მა ასევე ყურადღება გაამახვილა ირლანდიური ჯგუფის ამჟამინდელ საქმიანობაზე და გაამხილა, რომ ის და ბენდის სოლისტი ბონო ემბიენტის პიონერ ბრაიან ენოსთან ერთად „ახალ გიჟურ მუსიკაზე” მუშაობენ.
„ბონო და მე გიჟურ საი-ფაი ირლანდიურ ფოლკ მუსიკაზე ვმუშაობთ, რომელიც შესაძლოა U2-ს ახალი ალბომის ნაწილიც გახდეს. ჯერ არ ვიცით, ვნახოთ,” – თქვა მან.
ამას თუ დავუმატებთ „შესანიშნავი ირლანდიელი მუსიკოსების გუნდს”, რომლებიც, The Edge-ის თქმით, შესაძლოა ასევე ჩაერთონ პროცესში, ეს ყველაფერი ბენდის ჟღერადობაში უზარმაზარ ცვლილებაზე მიგვანიშნებს. U2-ს ახალი მუსიკით შექმნილი ბოლო ალბომი 2017 წელს გამოცემული Songs of Experience იყო. მას 2023 წელს Songs of Surrender მოჰყვა, თუმცა მასში უკვე გამოცემული სიმღერების ახალი ვერსიები შედიოდა.
2023 წელს კი ბონო ამბობდა, რომ მათი შემდეგი პროექტი “ხმაურიანი, უკომპრომისო და ირაციონალური” როკალბომი იქნებოდა, რომელსაც Songs of Ascent უნდა ჩაენაცვლებინა.
„არ ვფიქრობ, რომ მსოფლიო U2-ს შემდეგ ალბომს ელოდება” – თქვა ბონომ. „ვფიქრობ, ჩვენ უნდა მივცეთ მათ მიზეზი, რომ დაინტერესდნენ. მე უბრალოდ მინდა დიდი მუსიკა დავწერო, რადგან ეს არის ის, რითაც U2 დაიწყო – დიდი გუნდებითა და ნათელი იდეებით. მოდი, იქ დავბრუნდეთ, მაგრამ ამჯერად ეს ცოტაოდენი ბენზინითა და ასანთით გავაკეთოთ.”
ბიბისისთან საუბარში The Edge-მა ასევე გაამახვილა ყურადღება დრამერ ლარი მალენ ჯუნიორის დაბრუნებაზე, რომელმაც ქირურგიული ჩარევის შემდგომი რეაბილიტაციის გამო, ჯგუფის 2023-2024 წლის ლას-ვეგასის რეზიდენცია გამოტოვა. „ჩვენ ახლა დიდებულ ფაზაში ვართ, სადაც არ გვჭირდება ზედმეტად ფიქრი. ჩვენ უბრალოდ ვქმნით მუსიკას და მოგვწონს პროცესი,” – თქვა The Edge-მა. „U2 ისევ ლარისთან ერთადაა, რომელიც შესანიშნავია და ის ჩვენთან ერთადაა სტუდიაში. ასე რომ, წლის ბოლომდე კიდევ უფრო მეტს გავაკეთებთ.”
