სოციალურ ქსელში ელექტრონული მუსიკისა და საკლუბო სივრცის წარმომადგენლების ერთობლივი განცხადება გავრცელდა. ცნობისთვის, პროტესტის ნიშნად, თბილისის საკლუბო სცენა უკვე ორ კვირაზე მეტია, რაც გაფიცულია და სოლიდარობას უცხადებს აქციებზე დაკავებულ ყველა ადამიანსა და სისტემის მსხვერპლს.
„ბილბორდ საქართველო“ უცვლელად გთავაზობთ გავრცელებულ განცხადებას:
„საქართველოს ელექტრონული მუსიკისა და საკლუბო კულტურის სცენა სოლიდარობის მარშით ვერთიანდებით რეპრესიების წინააღმდეგ, პარასკევს, 13 დეკემბერს, 19:00 საათზე, და ვმართავთ მსვლელობას მარჯანიშვილის მოედნიდან პარლამენტამდე.
არალეგიტიმურმა ხელისუფლებამ წართმეული არჩევნების, რუსული და ანტი-ლგბტქ+ კანონების მიღების შემდეგ, ღიად და დეკლარირებულად უღალატა საქართველოს კონსტიტუციას და შეაჩერა ქვეყნის სწრაფვა ევროპულ ოჯახში გაწევრიანებისკენ, რასაც საზოგადოების უპრეცედენტო წინააღმდეგობა მოჰყვა. საპროტესტო აქციების დარბევის, ჟურნალისტებზე სასტიკი თავდასხმების და კრიმინალური დაჯგუფებების მხრიდან სადამსჯელო ღონისძიებების პარალელურად, უკანონოდ დაპატიმრებულია 400-ზე მეტი ადამიანი, რომელთა 80% გახდა ცემის, დამცირების, წამებისა და არაადამიანური მოპყრობის მსხვერპლი, რაც წარმოადგენს ტერორს საკუთარი ხალხის წინააღმდეგ. ჩადენილი დანაშაულებისთვის დღემდე არცერთი მოძალადე პოლიციელი არაა დასჯილი, პირიქით, ახალი კანონით, დემონსტრაციებზე დემონსტრანტთა გამოხატვის თავისუფლება იზღუდება.
პროტესტის ნიშნად, თბილისის საკლუბო სცენა ორ კვირაზე მეტია გაფიცულია და ძალა და ენერგია ახლა ქალაქის ქუჩებისკენაა მიმართული. მოვუწოდებთ თანამოაზრეებსა და მხარდამჭერებს, შემოუერთდნენ მსვლელობას, გავაგრძელოთ უკომპრომისო ბრძოლა და შრომა სოციალური სამართლიანობისა და საზოგადოებრივი კეთილდღეობისთვის – არ გვაქვს უფლება, ქვეყნისთვის ასეთ ეგზისტენციალურ მომენტში თუნდაც ერთი ნაბიჯით დავიხიოთ უკან.
სოლიდარობას ვუცხადებთ სისტემის ყველა მსხვერპლსა და მძევალს, ყველა შეუპოვარ და დაუმორჩილებელ ხმას და მოვითხოვთ:
აქციაზე დაკავებული ყველა დემონსტრანტის დაუყოვნებლივ გათავისუფლებას;
თავისუფალი და სამართლიანი არჩევნების ჩატარებას;
წინააღმდეგობას და დაუმორჩილებლობას ვუცხადებთ რეჟიმის მიერ შემოღებულ ყველა რეპრესიულ კანონს.
ელექტრონული მუსიკის სცენა და საკლუბო კულტურა ყოველთვის იყო და იქნება თანასწორობაზე, სოლიდარობასა და ურთიერთპატივისცემაზე, ერთმანეთის გაძლიერებაზე დაფუძნებული და იმ იდეების ერთგული, რომელიც ადამიანის სინდისის, გამოხატვისა და შემოქმედებითი თავისუფლების საწინდარია და არასდროს დავუშვებთ, რომ ეს საერთო მონაპოვარი განადგურდეს.” – აღნიშნულია განცხადებაში.“
