ცნობილმა ინგლისელმა ელექტრონულმა არტისტმა Aphex Twin-მა მსმენელებისათვის მოულოდნელად კომპილაციური ალბომი გამოუშვა, რომლის სახელწოდებაა Music from the Merch Desk (2016–2023). ალბომი ბოლო ათწლეულის განმავლობაში შეზღუდული რაოდენობით გამოცემულ ჩანაწერებს აერთიანებს.
კომპილაცია ზუსტად შვიდი წლის შემდეგ გამოვიდა იმ დღიდან, როდესაც მასში შესული ჩანაწერებიდან ერთ-ერთი ნამუშევარი, Houston, TX 12.17.16 გამოიცა. ეს ჩანაწერიც უახლესი ალბომის მსგავსად მოულოდნელად გამოქვეყნდა.
ამ პერიოდის განმავლობაში Aphex Twin-მა სხვადასხვა ჩანაწერი გამოსცა ეპიზოდურად. მათ შორის არის 2017, 2019 და 2023 წლებში ლონდონში გამართული კონცერტების, ასევე 2019 და 2023 წლებში მანჩესტერსა და ბარსელონაში ჩატარებული ღონისძიებების ჩანაწერები. ყველა ეს ჩანაწერი Warp Records- ის ლოგოთი იყო დამოწმებული და მალევე გაიყიდა, თუმცა შემდეგ ონლაინ გადამყიდველებმა მათზე მაღალი ფასები დააწესეს.
2024 წლის ოქტომბერში Aphex Twin-მა Selected Ambient Works Volume II-ის 30 წლის საიუბილეო გაფართოებული გამოცემა გამოუშვა. მიუხედავად იმისა, რომ ალბომის ორიგინალური გამოცემა 1994 წელს მხოლოდ ბრიტანეთის ჩარტებში მოხვდა, მისი შემდგომი პოპულარობა და გავლენა ხელახალი გამოცემისას ჩარტების ლიდერ პოზიციებზე დაწინაურებაში გამოიხატა. ალბომი კვლავ გავიდა პირველ ადგილზე ბრიტანეთის საცეკვაო ალბომების ჩარტში. Billboard 200-ში გამოცემამ 135-ე ადგილი, ხოლო საცეკვაო/ელექტრონული ალბომების ჩარტში მესამე ადგილი დაიკავა.
ბოლო ათწლეულის განმავლობაში უკვე ნახსენები ჩანაწერების პარალელურად, არტისტმა რამდენიმე EP და სინგლი გამოსცა, თუმცა სტუდიური ალბომი მუსიკოსმა ბოლოს 2014 წელს გამოუშვა. ეს იყო ალბომი, სახელწოდებით Syro, რომელმაც მომდევნო წელს გრემი მოიპოვა საუკეთესო საცეკვაო/ელექტრონული ალბომის კატეგორიაში.
