„დისნეის” არხზე მალე ლიონელ მესიზე შექმნილი ანიმაციური სერიალის პრემიერა შედგება. პროექტი Messi and the Giants „დისნეის” ტელევიზიამ Sony Music Vision-ისა და Sony Pictures Television – Kids-ისგან შეიძინა.
სამეცნიერო ფანტასტიკის ჟანრის ანიმაცია 12 წლის ბიჭის, ლეოს თავგადასავალს მიჰყვება, რომელიც თავისი სახლიდან, არგენტინიდან, ალტერნატიულ სამყაროში გადაინაცვლებს. სერიალი წარმოაჩენს, თუ როგორ უპირისპირდება პერსონაჟი სირთულეებს, ქმნის გუნდს და პოულობს გზას, თუ როგორ გახდეს გმირი.
„ყოველთვის ვოცნებობდი, მონაწილეობა მიმეღო პროექტში, რომელიც ახალ თაობას ჩემს სპორტულ ღირებულებებს გაუზიარებდა – იმ ღირებულებებს, რომლებიც უმნიშვნელოვანესია ჩემს კარიერაში,” – აღნიშნა მესიმ პრესრელიზში. „არაფერია შეუძლებელი გუნდურად მუშაობის, შეუპოვრობის, დისციპლინისა და შრომის შემთხვევაში. ერთი სული მაქვს, სერიალი მთელი მსოფლიოს ბავშვებს გავუზიარო და იმედი მაქვს, მისი საშუალებით მათ შთაგონებასა და მოტივაციას მივცემ, რომ თავიანთი ოცნებები აისრულონ. ყოველთვის ძალიან მიყვარდა ანიმაციური ფილმები და ერთი სული მაქვს, როდის ვუყურებ ჩემს შვილებთან ერთად.”
Messi and the Giants-ის თითოეული ეპიზოდი 22-წუთიანია. სერიალის პრემიერა „დისნეის” არხზე შედგება, რომელსაც DIsney+ მოჰყვება. სერიები რამდენიმე ენაზე იქნება ხელმისაწვდომი, მათ შორის ინგლისურსა და ესპანურზე.
Disney
„ფეხბურთი მსოფლიოში ყველაზე პოპულარული სპორტია, რომელიც ყველა ასაკის მილიონობით ფანს აერთიანებს,” – ამბობს ეიო დევისი, „დისნეის” ტელევიზიის პრეზიდენტი. „ვამაყობთ ლიონელ მესისთან და Sony Pictures Television-თან თანამშრომლობით, რათა Messi and the Giants ჩვენს პატარა აუდიტორიას წარვუდგინოთ. ვიცით, რომ ოჯახის, მეგობრობისა და გუნდურობის თემები რეზონანსული იქნება არა მხოლოდ ფეხბურთის გულშემატკივრებისთვის, არამედ ყველა ადამიანისთვის, ვისაც დიადი ამბები უყვარს.”
ამ დრომდე მესი ერთადერთი სპორტსმენია, რომელიც რვა ოქროს ბურთისა და ექვსი ოქროს ბუცის მფლობელია. 2023 წლის ივლისიდან ის საფეხბურთო კლუბ ინტერ მაიამიში თამაშობს.
