არიანა გრანდე კვლავ განაგრძობს საშობაო ქველმოქმედებას. Manchester Foundation Trust Charity-ს განცხადებით, მომღერალმა ფონდს საჩუქრები გადასცა იმ ბავშვებისათვის, რომლებსაც, ხანგრძლივი მკურნალობის გამო, დროებით საავადმყოფოებში უწევთ ცხოვრება და შობასაც სწორედ სამედიცინო დაწესებულებებში ხვდებიან.
„არიანა გრანდეს უზომოდ მადლიერი ვართ იმისთვის, რომ შობას ჩვენი პატარა პაციენტები გაიხსენა. მის მიერ გამოგზავნილი საჩუქრები გადაეცა ჩვილებს, ბავშვებსა და მოზარდებს, რომლებიც დროებით ცხოვრობენ Royal Manchester Children’s Hospital-ში, Trafford General Hospital-ში, Wythenshawe Hospital-სა და North Manchester General Hospital-ში,“ – წერს ბრიტანული ორგანიზაცია, რომელიც სამედიცინო კვლევებზე, უმაღლესი დონის აპარატურის შეძენასა და მისი ბენეფიციარი 10 საავადმყოფოს საჭიროებების დაკმაყოფილებაზეა ფოკუსირებული. პოსტს თან ახლდა ფოტოები, რომლებზეც საავადმყოფოში მყოფი ბავშვები შეფუთულ საჩუქრებთან ერთად იყვნენ გადაღებული.
Billboard-მა კომენტარისთვის არიანა გრანდეს წარმომადგენლებს მიმართა.
ეს არ არის პირველი შემთხვევა, როცა Wicked-ის ვარსკვლავმა საქველმოქმედო ორგანიზაციას საჩუქრები გადასცა. იგივე 2022 წლის მაისშიც მოხდა, როდესაც ხუთი წელი შესრულდა მას შემდეგ, რაც მანჩესტერში, გრანდეს კონცერტზე, Manchester Arena-ში თვითმკვლელის მიერ მოწყობილი ტერორისტული აქტის შედეგად 22 ადამიანი დაიღუპა და 800-ზე მეტი დაშავდა.
პოპ-ვარსკვლავმა 2017 წელს თავდასხმისას დაზარალებულების და დაღუპულების ოჯახების დასახმარებლად One Love Manchester-ის სახელწოდებით მასშტაბური კონცერტი გამართა. კონცერტზე გრანდეს გარდა მონაწილეობდნენ ჯასტინ ბიბერი, მაილი საირუსი, რობი უილიამსი, ნაილ ჰორანი, სტივი უანდერი და სხვა არტისტები. კონცერტი პირდაპირ ეთერში გადაიცემოდა და მის ფონდში 12 მილიონ დოლარზე მეტი ჩაირიცხა. ეს თანხა წითელი ჯვრის ორგანიზაციას და We Love Manchester Emergency Fund-ს გადაეცა.
