რეგიონში პირველად, სასტუმრო „ტელეგრაფის” ბოლო სართულზე Rolling Stone-ის ლეგენდარული ბრენდის კლუბი და ღონისძიებათა სივრცე გაიხსნება. „ტელეგრაფი”, რომელიც მსოფლიოს წამყვანი სასტუმროების ქსელის The Leading Hotels of The World-ის წევრია, სტუმრებს 2025 წლის გაზაფხულზე უმასპინძლებს. სასტუმრო „სილქ დეველოპმენტის“ მიერ შეიქმნა და მას „სილქ ჰოსფითალითის“ მართავს. „ტელეგრაფი”, ისევე, როგორც Rolling Stone-ის სივრცე, განკუთვნილია ადგილობრივი და უცხოელი სტუმრებისთვის, რომელთაც განსხვავებული გამოცდილების მიღება სურთ.
„სილქ ჰოსფითალითის” თქმით, სასტუმრო რეგიონის უნიკალურ მიზიდულობის წერტილად იქცევა, Rolling Stone-ის სივრცე კი ქალაქში გართობისა და დასვენების ერთ-ერთი გამორჩეული ადგილი იქნება.
მსოფლიოში ცნობილი არქიტექტურული დიზაინის სტუდიის, Neri&Hu-ს მიერ დაპროექტებული სასტუმრო „ტელეგრაფის” მიზანია თბილისის ცენტრში მომსახურების უმაღლესი სტანდარტის დამკვიდრება, რაც უნაკლო სერვისში, უნიკალურ იდენტობასა და სტუმარ-მასპინძლობის უმაღლეს ხარისხში გამოიხატება.
ლეგენდარული Rolling Stone-ის ბრენდის „ტელეგრაფში” შემოსვლა სრულ თანხვედრაშია “სილქ როუდ ჯგუფის” ხედვასთან. 50-წლიანი ისტორიით Rolling Stone ერთ-ერთი ყველაზე სანდო და გავლენიანი მედიაა, რომელიც მსოფლიოს მასშტაბით 60 მილიონზე მეტ მკითხველს მუსიკალური კულტურის ყველა ასპექტზე სიღრმისეულ ინფორმაციას აწვდის. ბრენდი დაუვიწყარ გამოცდილებას ჰპირდება „ტელეგრაფის” სტუმრებსაც, რაც მოიცავს ექსკლუზიურ წვდომას გასართობ და საინფორმაციო კონტენტზე. სასტუმროს ბოლო სართულზე განთავსებული მუსიკალური სივრცე კი სტუმრებს მუსიკის ისტორიაში ამოგზაურებს და ლეგენდარული მუსიკოსების ისტორიებს გააცნობს.
