Associated Press-ის ინფორმაციით, ლოს-ანჯელესის საოლქო უზენაესი სასამართლოს მიხედვით, ჯენიფერ ლოპესისა და ბენ აფლეკის განქორწინების აქტი 21 თებერვალს დასრულდა. სამართლებრივად, ბენ აფლეკი და ჯენიფერ ლოპესი ახლა უკვე თავისუფალ პირებად ითვლებიან. წყვილი განქორწინებაზე 6 იანვარს შეთანხმდა.
სასამართლო დოკუმენტებიდან ირკვევა, რომ ჯენიფერ ლოპესმა და ბენ აფლეკმა განქორწინების საკითხი მედიაციის გზით სექტემბერში მოაგვარეს, რამაც მათ საშუალება მისცა, ხანგრძლივი სასამართლო დავები თავიდან აეცილებინათ.
წყვილი თავდაპირველად ერთმანეთს 2002 წელს, ფილმ Gigli-ს გადაღებაზე შეხვდა. ჯენიფერ ლოპესი და ბენ აფლეკი მალევე დაინიშნნენ, თუმცა 2004 წელს დაგეგმილი ქორწილი გააუქმეს. თითქმის ორი ათწლეულის შემდეგ, 2021 წელს, მათ ურთიერთობა კვლავ აღადგინეს და 2022 წელს იქორწინეს.
„არასოდეს მიფიქრია, რომ ჩვენ ისევ ერთად ვიქნებოდით, უბრალოდ ვერ ვუშვებდი იმ აზრს, რომ ჩემთვის რაღაც საოცარი აღარ არსებობდა, მიუხედავად იმისა, რომ სიტუაცია ზოგჯერ საკმაოდ რთული იყო, მე ყოველთვის ღრმად მჯეროდა, რომ ბოლომდე არ უნდა დავნებებულიყავი.“ – განუცხადა ჯენიფერ ლოპესმა Billboard-ს 2024 წლის თებერვალში, ფილმ This Is Me… Now: A Love Story-ს გამოსვლამდე, რომელიც მათი აღდგენილი ურთიერთობის ისტორიას გვიყვება.
მომღერალმა და მსახიობმა ბენ აფლეკთან განქორწინების მოთხოვნა ქორწინებიდან დაახლოებით ორი წლის შემდეგ შეიტანა. საწყის განცხადებაში ჯენიფერმა განქორწინების თარიღად 2024 წლის 26 აპრილი დაასახელა, დაშორების მიზეზად კი „შეურიგებელი უთანხმოება“ მოიხსენია.
განქორწინების შეთანხმების დოკუმენტების მიხედვით, წყვილი ქონებისა და აქტივების გაყოფის პირობებზე შეთანხმდა. ორივემ უარი თქვა ალიმენტებზე და მედიატორ ლორა ვასერის მეშვეობით მიღწეული შეთანხმების სამართლებრივი ხარჯები თანაბრად გაიყვეს. ვარსკვლავი ოფიციალურად სამართლებრივ სახელს – ჯენიფერ აფლეკს შეიცვლის და პირვანდელ სახელს, ჯენიფერ ლოპესს დაიბრუნებს.
ჯენიფერი მანამდე ოხანი ნოასთან, კრის ჯადსა და მარკ ენტონისთან იმყოფებოდა ქორწინებაში. მას ორი შვილი ჰყავს. ბენ აფლეკი კი წარსულში ჯენიფერ გარნერზე იყო დაქორწინებული, რომელთანაც სამი შვილი ჰყავს.
2024 წლის ოქტომბერში, ბენ აფლეკთან დაშორების შემდეგ, ჯენიფერ ლოპესმა საკუთარ განცდებზე ისაუბრა და განმარტა, როგორი მნიშვნელოვანია მისთვის თავისუფლად ყოფნა:
„ჩემთვის ვფიქრობ: ჯანდაბა, ეს ზუსტად ისაა, რაც მჭირდებოდა, მადლობა ღმერთს, ბოდიში რომ ამდენი ხანი დამჭირდა ამის გასააზრებლად. ბოდიში იმისთვის, რომ ამდენჯერ მომიწია ამ გაკვეთილის გავლა. მეორე ან მესამე შემთხვევაზე ალბათ უნდა მესწავლა, თუმცა ამას ახლა მივხვდი. აღარავის ვეძებ, რადგან ბოლო 25-30 წლის განმავლობაში ხშირად აღმოვჩნდი საკმაოდ რთულ სიტუაციაში. ჩემს თავს ვეუბნები, თუ რას გავაკეთებ, როცა მარტო მე ვიქნები. მინდა მარტო ვიფრინო, რა მოხდება, თუ უბრალოდ თავისუფალი ვიქნები.” განუცხადა ჯენიფერ ლოპესმა Interview-ს.
