Metallica-ს საქველმოქმედო ფონდი All Within My Hands ლოს-ანჯელესის ტყის ხანძრების დასახმარებლად 500,000 დოლარს გამოყოფს. როგორც პრესრელიზშია აღნიშნული, თანხა კალიფორნიის სათემო ფონდისა და პასადენას საზოგადოების ფონდში გადაირიცხება. აღსანიშნავია, რომ Metallica-ს ფონდი სხვადასხვა საკითხზე მომუშავე სოციალურ და აქტუალურ თემებზე მომუშავე ფონდებსა თუ პირებს ხშირად ეხმარება. „All Within My Hands მდგრადი თემების შექმნისთვის, სამუშაო ძალის გაძლიერებისთვის და განათლებისთვის მუშაობს, ჩართულია შიმშილის წინააღმდეგ ბრძოლაში და სხვა მნიშვნელოვანი ადგილობრივი სერვისების მხარდაჭერაში.” – აღნიშნულია ფონდის ვებსაიტზე.
ლოს-ანჯელესში ტყის მასშტაბური ხანძარი 7 იანვარს დაიწყო და რამდენიმე ათას ჰექტარზე გავრცელდა. განადგურებულია 12 000-ზე მეტი შენობა და კალიფორნიის შტატს მილიარდობით დოლარის ოდენობის ზარალი მიადგა.
პალისეიდეში ხანძარმა 96 კვადრატული კილომეტრი გადაწვა, მეხანძრეებმა ცეცხლის მხოლოდ 14 % კონტროლი შეძლეს.
გასული კვირის განმავლობაში ხანძარმა 24 ადამიანის სიცოცხლე იმსხვერპლა. ევაკუაციის ახალი განკარგულება 100 000-ზე მეტ ადამიანს შეეხო.
გამანადგურებელი სტიქიის შედეგად დაზარალებული ადამიანებისთვის რამდენიმე ფონდი აქტიურად მუშაობს, მათ შორის არიან MusiCares, Recording Academy, Los Angeles Fire Relief Effort. მუსიკის სფეროში მომუშავე პროფესიონალების დასახმარებლად, ვინც მუსიკალურ ინდუსტრიაში ხუთ წელზე მეტია, რაც მოღვაწეობს, გამოყოფილია ფინანსური დახმარება და საკვები ვაუჩერები.
