პირველი ინგლისური მძიმე-მეტალ ჯგუფი, Black Sabbath უკანასკნელი კონცერტის შესახებ ინფორმაციას აქვეყნებს. კონცერტი 5 ივლისს გაიმართება და მასში ბენდის კლასიკური შემადგენლობა მიიღებს მონაწილეობას: ვოკალისტი ოზი ოსბორნი, გიტარისტი ტონი აიომი, ბასისტი გიზერ ბატლერი და დრამერი ბილ უორდი.
კონცერტი ინგლისში, ბენდის მშობლიურ ქალაქ ბირმინგემში, Villa Park-ში, გაიმართება.
Black Sabbath-ის ამ კონცერტის შესახებ ინფორმაცია 5 თებერვალს, ტონი აიომიმ და შერონ ოსბორნმა, ოზი ოსბორნის მენეჯერმა და მეუღლემ გაავრცელეს.
ჯგუფის უკანასკნელ საკონცერტო გამოსვლას Back To The Beginning („დაბრუნება დასაწყისში“) ეწოდა.
„ეს ჩემი დროა, რათა დავბრუნდე დასაწყისში… დროა, იმ ადგილს დავუბრუნდე, სადაც დავიბადე. გამიმართლა, რომ ეს იმ ადამიანების დახმარებით შემიძლია გავაკეთო, ვინც მიყვარს. ბირმინგემი არის მეტალის ნამდვილი სახლი. ბირმინგემი სამუდამოდ!“ – ნათქვამია ოზი ოსბორნის განცხადებაში.
Black Sabbath-ის გაერთიანებასთან ერთად, კონცერტი, მრავალი სხვა ჟანრის წამყვანი ჯგუფების გამოსვლებს მოიცავს, მათ შორის იქნებიან: Metallica, Slayer, Anthrax, ასევე ჯგუფები Pantera, Lamb of God, Mastodon, Alice in Chains, Halestorm და Gojira.
კონცერტზე ასევე გამოვლენ სხვა ცნობილი შემსრულებლები: Smashing Pumpkins-ის ფრონტმენი ბილი კორგანი, Disturbed-ის დეივიდ დრეიმენი, Guns N’ Roses-ის დაფ მაკაგანი და Limp Bizkit-ის ფრედ დერსტი.
საუბარია, რომ სიმღრების ავტორი და Rage Against the Machine-ის ყოფილი წევრი ტომ მორელო Back To The Beginning-ის კონცერტისთვის მუსიკალურ დირექტორად იმუშავებს. „ეს კონცერტი იქნება ისტორიის მანძილზე ყველაზე მასშტაბური მძიმე მეტალ-შოუ.“ – აღნიშნავს ის პრესრელიზში.
კონცერტის ბილეთების გაყიდვა Live Nation-ზე 14 თებერვალს დაიწყება. გაყიდული ბილეთებიდან შემოსული თანხა კი საქველმოქმედო ორგანიზაციებს გადაეცემა.
