ნილ იანგის უკრაინელ ფანებს კიდევ მოუწევთ ლოდინი, რომ მუსიკოსი პირადად ნახონ. იანგმა უკრაინაში ცოტა ხნის წინ დაგეგმილი უფასო კონცერტი გააუქმა.
აღნიშნული კონცერტი მუსიკოსმა თვის დასაწყისში დააანონსა და გაამხილა, რომ ის წინ წარუძღვებოდა მის ევროპულ ტურნეს. მას შემდეგ სხვა დეტალები არ გაჟღერებულა, თუმცა ცნობილია, რომ ტურნე შვედეთში 18 ივნისს იწყება, რაც იმას ნიშნავს, რომ უკრაინული კონცერტი მანამდე უნდა გამართულიყო. 20 მარტს კი იანგმა სამწუხარო ინფორმაცია გაავრცელა და განაცხადა, რომ უკრაინაში დაგეგმილი შოუ აღარ შედგება.
„კარგი ადგილი გვქონდა შერჩეული, მაგრამ სიტუაცია ზედმეტად ცვალებადია,” – დაწერა მუსიკოსმა. „საღ გონებაზე არ უნდა ვიყო, რომ ჩემი გუნდი იმ ტერიტორიაზე წავიყვანო. ბოდიშს ვუხდი ყველას. უკრაინა დიდებული ქვეყანაა კარგი ლიდერით. Slava Ukraini.”
უკრაინის შოუს გაუქმებამდე იანგმა დააანონსა, რომ მის კონცერტებზე ე.წ. პლატინის ბილეთები აღარ გაიყიდება. ეს გადაწყვეტილება კი, მისი თქმით, The Cure-ის რობერტ სმითის ინტერვიუს შემდეგ მიიღო.
„ეს ეხება იმ სამწუხარო ამბებს, რაც მსოფლიოს მასშტაბით ხდება კონცერტებთან მიმართებით. ეს დამეხმარა იმის გააზრებაში, რომ არჩევანი უნდა გავაკეთო, რითაც შემიძლია, ჩემი მელომანი მეგობრებისთვის რაღაც შევცვალო. ჩემი მენეჯერები და აგენტი მუდამ ჩემს დაცვას ცდილობდნენ და საუკეთესო შეთავაზებებზე მუშაობდნენ. ისინი ცდილობდნენ, მე და ჩემი ფანები დავეცავით გადამყიდველებისგან, რომლებიც საუკეთესო ბილეთებს ყიდულობენ და შემდეგ, მოგების მიღების მიზნით, დიდი ფასნამატით ყიდიან. სწორედ ამიტომ, გამოვიდა Ticketmaster-ის ძვირადღირებულ პლატინის ბილეთები იმ არეალებში, სადაც უმეტესად ბილეთებს სწორედ გადამყიდველები იძენდნენ. ეს ფული კი ჩემთან მოდიოდა, რაც სამართლიანი არ იყო.”
ევროპულ ტურნეში იანგი ბენდ Chrome Hearts-თან ერთად გაემგზავრება. ბენდის შემადგენლობაში არიან მუსიკოსის დიდი ხნის საქმიანი პარტნიორი, კლავიშისტი და ორგანისტი სპუნერ ოლდჰემი და ასევე Promise of the Real-ის წევრები: მიკა ნელსონი (გიტარა/ვოკალი), კორი მაკორმიკი (ბასი) და ენთონი ლოგერფო (დრამი). კოლექტივმა იანვარში გამოსცა სიმღერა Big Change. იანგი ბენდს გასულ წელს შეუერთდა. მისი თქმით, ჯგუფის ერთობლივი ალბომის გამოსვლა აპრილის თვეში იგეგმება.
