ჯენიფერ ლოპესი American Music Awards-ზე წამყვანისა და შემსრულებლის სტატუსით ბრუნდება. American Music Awards-ის დაჯილდოება ჯენიფერ ლოპესმა პირველად 2015 წელს წაიყვანა, როდესაც შოუ სიმღერით Waiting for Tonight გაიხსნა. ღონისძიება 26 მაისს CBS-ისა და Paramount+-ის საშუალებით გადაიცემა.
„მოხარული ვართ, რომ ჯენიფერ ლოპესი American Music Awards-ს კვლავ უმასპინძლებს, ჯენიფერი საოცრად ნიჭიერი და შეუდარებელი შემსრულებელია, შოუსთვის კი – იდეალური წამყვანი. დარწმუნებულნი ვართ, რომ ზაფხულის ცერემონიას ის თავისი საოცარი ენერგიით გააცოცხლებს” – ნათქვამია Dick Clark Productions-ის აღმასრულებელი დირექტორის, ჯეი პენსკის განცხადებაში.
ჯენიფერ ლოპესს სამჯერ აქვს მოგებული American Music Awards: 2003 წელს – საუკეთესო პოპ/როკ მომღერლის, ხოლო 2007 და 2011 წლებში საუკეთესო ლათინო-ამერიკელი არტისტის ნომინაციაში გაიმარჯვა. 2001 წლის თებერვალში ლოპესი პირველი ქალი არტისტი გახდა, რომელიც ერთდროულად ფლობდა N1 ალბომს Billboard 200-ზე (J.Lo) და N1 ფილმს – კინოგაქირავებაში (The Wedding Planner).
შოუ 1974 წლიდან 2022 წლამდე ABC-ზე გადიოდა, American Music Awards-ის წლევანდელი ღონისძიება კი პირველად გავა CBS-ზე. გარდა ამისა, ეს იქნება პირველი შოუ, რომელიც ამერიკის ეროვნულ დღესასწაულზე 26 მაისს, მემორიალის დღეს გაიმართება, მომავალში კი ყოველწლიური American Music Awards-ის ღონისძიება სწორედ ამ დღეს ჩატარდება, რათა აშშ-ის ჯარისკაცებსა და ვეტერანებს პატივი მიაგონ და ამავდროულად, წლის ყველაზე პოპულარული მუსიკალური ვარსკვლავები გამოავლინონ. შოუ 1974 წლიდან 2003 წლამდე ყოველწლიურად იანვარში ან თებერვალში იმართებოდა, ხოლო 2003 წლიდან 2022 წლამდე – ოქტომბერ-ნოემბერში.
American Music Award – ლეგენდარულმა პროდიუსერმა დიკ კლარკმა შექმნა, სადაც გამარჯვებული გულშემატკივრების ხმის მიცემით ვლინდება.
2025 წლის AMAs გლობალურად გავა როგორც ტელეარხებზე, ასევე ციფრულ პლატფორმებზე.
