სოსო ლაღიძის სახელობის ხელოვნების საერთაშორისო ფესტივალი ,,თბილისი რიტმი’’ 4 მაისს ცნობილი კუბელი მუსიკოსის, რობერტო ფონსეკას და მისი ბენდის La Gran Diversion კონცერტით გაიხსნა. საპრემიერო პროექტი აუდიტორიის წინაშე მრავალფეროვანი პროგრამით წარდგა.
რობერტო ფონსეკა მრავალი საერთაშორისო ნომინაციისა და ჯილდოს მფლობელია. მისი მუსიკა ევროპული, აფრიკული და კარიბიული კულტურული ტრადიციების უნიკალური ნაზავია. პროექტი La Gran Diversión პიანისტის გამორჩეული პროექტია, რომელსაც თანამედროვე ლათინურ ჯაზში განსაკუთრებული ადგილი უჭირავს.
“მოხარულები ვართ რომ დღეს აქ ვართ, თქვენთან ერთად. ამ საღამოს თქვენთვის ლამაზ სიმღერებს შევასრულებთ და იმედი მაქვს, ყველა ერთად ვისიამოვნებთ ტრადიციული კუბური მუსიკის თანამედროვე ჟღერადობით. პროექტს, რომელსაც ჩვენ წარვადგენთ, ოფიციალურად La Gran Diversion ეწოდება. იმედი მაქვს, ისიამოვნებთ. კიდევ ერთხელ მადლობას გიხდით აქ მოსვლისთვის.” – განაცხადა რობერტო ფონსეკამ კონცერტის მსვლელობისას.
ფესტივალის მომდევნო საღამო 15 ივნისს გაიმართება, სადაც თბილისს პირველად მსოფლიო ბალეტის ვარსკვლავი ნატალია ოსიპოვა ახალი საცეკვაო პროგრამა Force of Nature-ით ესტუმრება, 9 სექტემბერს კი გრიბოედოვის თეატრში აუდიტორიის წინაშე ცნობილი ფრანგი აკორდეონისტი რიშალ გალიანო წარდგება.
ფესტივალი „თბილისი რიტმი“ მრავალმხრივ კულტურულ პლატფორმად იქცა, რომელიც როგორც ადგილობრივ, ასევე საერთაშორისო სახელოვნებო სივრცეს აერთიანებს. ფესტივალის მთავარი მიზანია ქართული და უცხოური შემოქმედებითი პოტენციალის ინტეგრაცია, საერთაშორისო თანამშრომლობის გაღრმავება და თანამედროვე კულტურული დიალოგის შექმნა.
ფესტივალი ,,თბილისი რიტმი“ დღეს უკვე ქალაქის კულტურული მოვლენების ერთ-ერთ ყველაზე გამორჩეულ ნიშას იკავებს, სადაც შთაგონება, ინოვაცია და ახალი შესაძლებლობები ერთიანდება.
