რამდენიმე დღის წინ ამერიკელმა მსახიობმა ნიკოლას კეიჯმა გაიხსენა ამბავი, როცა ავსტრალიელ მუსიკოს ნიკ კეივში შეეშალათ. ამ ამბავს თავად ნიკ კეივიც გამოეხმაურა და აღნიშნა, რომ მსგავსი შემთხვევები მასთანაც ხშირია.
გასულ კვირას ნიკოლას კეიჯმა ბრიტანულ გამოცემა The Guardian-თან ინტერვიუში აღნიშნა, რომ 2022 წელს მას ნიკ კეივის შესახებ დაუსვეს კითხვა.
„მგონი, დღე არ გადის, რომ ვინმეს ნიკ კეივში არ შევეშალო. ის ძალიან კეთილი ადამიანია. ერთხელ ერთად ვიყავით ცხოველთა თავშესაფარში, ტეხასში, – Sealy Animal Hospital-ში. მივესალმე, ხელი გავუწოდე ჩამოსართმევად და ვუთხარი, რომ ჩვენ მხოლოდ ერთი ასო გვანსხვავებს და ეს არის G – ნიკ კეივი, ნიკ კეიჯი“ – აღნიშნა მსახიობმა.
ნიკ კეივი ამ ამბავს საკუთარ ბლოგზე, The Red Hand Files-ზე გამოეხმაურა: „წავიკითხე ნიკ კეიჯის სტატია The Guardian-ში და ძალიან მეცნო მისი გამოცდილება, ჩვენი სახელების გარშემო ყოველთვის არსებობდა გარკვეული დაბნეულობა.” – წერს მომღერალი.
შემდეგ ნიკ კეივმა გაიხსენა ისტორია, როდესაც იგი სან-პაოლოში ცხოვრობდა, ერთხელ ბარში ბრაზილიელ მამაკაცს ნიკ კეიჯში შეეშალა. მომღერლის თქმით, ბიჭი ისე შეეცოდა, რომ გადაწყვიტა, დროებით მსახიობის როლი მოერგო.
„ნელ-ნელა ძალიან შევეჩვიე ამ თამაშს, ვუთხარი, რომ Raising Arizona-ს გადაღება ჩემს კარიერაში ყველაზე გამორჩეული გამოცდილება იყო, რომ ჯონ გუდმანი საოცრად საინტერესო პიროვნებაა და რომ ძმები კოენები თავიანთ სფეროში ნამდვილი პროფესიონალები არიან, მოკლედ ყველაფერს ვამბობდი, რაც კი თავში მომდიოდა.” – იხსენებს ნიკ კეივი.
„სხვათა შორის, ასეთი დაბნეულობა ჩემსა და ბატონ კეიჯთან დაკავშირებით საკმაოდ ხშირია, თუმცა არ ვდარდობ, მე მისი გულშემატკივარი ვარ. ნახეთ Monday? ღმერთო ჩემო, საოცარი ფილმია.” – წერს ნიკ კეივი.
