ოზი ოსბორნი დარწმუნებულია, რომ Black Sabbath-ის ფინალურ შოუზე სცენაზე აუცილებლად ავა. მეტალის ლეგენდა 2018 წლის შემდეგ პირველი სრული კონცერტისთვის ემზადება. ბილი მორისონთან, SiriusXM-ის გადაცემაში Ozzy Speaks, მომღერალმა აღნიშნა, რომ ამისთვის ყველაფერს აკეთებს. შოუ სახელწოდებით Back to the Beginning 5 ივლისს მის მშობლიურ ქალაქ ბირმინგემში, Villa Park-ზე გაიმართება.
„ბოლოს ფიზიკურად აქტიური შრომა დაახლოებით შვიდი წლის წინ გავწიე“, – ამბობს ოზი. „მაგრამ ასე თუ ისე, ყველაფრის ფასად მივაღწევ სცენამდე“. ფინალურ კონცერტზე Black Sabbath-თან ერთად დაუკრავენ Metallica, Mastodon, Anthrax, Pantera, Alice in Chains, Gojira, Slayer და ასევე სუპერჯგუფი, რომლის შემადგენლობაშიც ვხედავთ მუსიკოსებს ისეთი საკულტო ბენდებიდან, როგორებიც არის Guns N’ Roses-დან, Smashing Pumpkins, Limp Bizkit, Judas Priest, Rage Against the Machine და სხვები.
ოზიმ ასევე ისაუბრა მკაცრ სარეაბილიტაციო რეჟიმზე, რომელსაც ხერხემლის ოპერაციისა და პარკინსონის დიაგნოზის შემდეგ გადის. „მყავს ტრენერი, რომელიც სპეციალიზებულია იმ პაციენტებზე, ვინც ცხოვრებას სერიოზული პრობლემების შემდეგ უბრუნდება. რთულია, მაგრამ ის მარწმუნებს, რომ შევძლებ. მეც მაქსიმუმს ვდებ“.
ოზი, რომელიც უკვე 76 წლისაა, არ მალავს, რომ შოუს გამო ზოგჯერ ღელავს: „ხანდახან ვნერვიულობ, მაგრამ თუ ყოველდღე ამ ფიქრში ვიქნები, ჭკუიდან შევიშლები. ასე რომ, ერთი დღე – ერთი ნაბიჯი. სხვა გზა არ მაქვს. აკვიატებული აზრები მახასიათებს, ალბათ ობსესიურ-კომპულსიური დარღვევაც. მაგრამ ახლა ამას გვერდზე ვდებ და ყველაფერს ვაკეთებ 120 პროცენტით“.
გაზეთ Guardian-თან ინტერვიუში ოზიმ თქვა: „იქ ვიქნები და რაც შემეძლება, მაქსიმალურად გავაკეთებ. მთავარია, მივიდე“. ამ ამბავს გამოეხმაურა Tool-ის ვოკალისტი, რომელმაც აღნიშნა, რომ ოზის სცენაზე დაბრუნება „ჩვენი დროის სასწაული“ იქნება, თუ გავითვალისწინებთ მისი ჯანმრთელობის მდგომარეობას.
ბოლო სრულ კონცერტზე ოზიმ 2018 წლის 31 დეკემბერს დაუკრა. ეს ჯერ კიდევ პარკინსონის დიაგნოზის გასაჯაროებამდე მოხდა. „არ ვგეგმავ Black Sabbath-ის სრულ პერფორმანსში გამოსვლას, უფრო პატარა მონაკვეთებზე ვიმუშავებ. ვაკეთებ იმას, რაც კომფორტულად მეჩვენება,” – ამბობს მუსიკოსი.
