Glastonbury-ს ფესტივალზე Charli XCX-ის გამოსვლას მსმენელი განსაკუთრებით ელოდა. მას შემდეგ, რაც მომღერალმა გასულ წელს გამოუშვა თავისი მეექვსე ალბომი Brat, ჩანაწერის კამპანია, მისი ფოსფორისფერი ესთეტიკა და ენერგია პოპკულტურის განუყოფელ ნაწილად იქცა. ალბომის წარმატებამ ის მრავალი ჯილდოს მფლობელ არტისტად და ერთ-ერთ ყველაზე გაყიდვად ბრიტანელ ვარსკვლავად აქცია.
Charli XCX-ის ასეთი ხმაურიანი საფესტივალო გამოჩენა განსაკუთრებით შთამბეჭდავია, თუ გავიხსენებთ, რომ სულ სამი წლის წინ მისი კარიერის განვითარებას ასე არავინ. ელოდა. ის თავს უხერხულად გრძნობდა მსხვილი ლეიბლების სისტემაში და მტკივნეულად მიიღო 2022 წლის ალბომის – Crash-ის შეფასებები. თუმცა, მიუხედავად ჩავარდნებისა, მისგან ახლა უკვე იგრძნობა თავდაჯერებული ენერგია.
Charli 60 ათასზე მეტი მაყურებლის წინაშე გამოვიდა. მას სცენაზე შავი ტყავის კოსტიუმი ეცვა და Alexander McQueen-ის შარფი ეკეთა. სცენაზე მხოლოდ თეთრი შუქები ენაცვლებოდა ერთმანეთს, ენერგიული მუსიკა კი კლუბურ ატმოსფეროს ქმნიდა. სცენის ვიზუალი ასევე Brat-ის ესთეტიკით იყო შთაგონებული. სპეციალურად მოწვეული სტუმრების გარეშე, Charli XCX მსმენელის წინაშე სოლო, მინიმალისტური შოუთი წარდგა. Glastonbury-ს ორგანიზატორებმა სპეციალურად ამ შოუსთვის სცენის ტევადობა გაზარდეს, რათა შესაძლო სიმჭიდროვე აეცილებინათ.
