ბიონსე თავის მშობლიურ ქალაქში, ჰიუსტონში გამართულ კონცერტზე ჰაერში დაფრინავდა, როცა ტრანსპორტის სახით გამოყენებული რეკვიზიტი – ჰაერში დაკიდებული წითელი მანქანა, რომელიც სპეციალურად Cowboy Carter-ის ტურისთვის არის მოწყობილი – მოულოდნელად მწყობრიდან გამოვიდა და გვერდზე გადაიხარა. ინციდენტი 28 ივნისს NRG სტადიონზე მოხდა, როცა ბიონსე თავის ცნობილ ჰიტს, 16 Carriages-ს ასრულებდა.
ჰაერში დაკიდებულ მანქანაში მჯდარმა ბიონსემ სიმღერა არ შეწყვიტა, თუმცა ბოლოს მისი ხმა მიკროფონში მკაფიოდ გაისმა, როცა ეკიპაჟს მიმართა სიტყვებით: „გაჩერდით, გაჩერდით, გაჩერდით.“ ამ მომენტში მუსიკა შეწყდა. ინციდენტით შეშფოთებული მსმენელების რეაქცია კარგად ისმოდა ვიდეოებში, რომლებიც მოგვიანებით აიტვირთა ინტერნეტში.
თაყვანისმცემლების მიერ გადაღებულ კადრებში ჩანს, რომ ბიონსე სიმშვიდეს ინარჩუნებს და აუდიტორიას თბილად უღიმის, სანამ მანქანა დაბლა დაეშვება. „თუ ოდესმე ჩამოვვარდები, ვიცი, რომ თქვენ დამიჭერთ,“ – იხუმრა ბიონსემ სცენაზე დაბრუნებისას, შემდეგ კი სიმღერა განაგრძო.
მომხდარის შემდეგ ბიონსეს წარმომადგენლებმა ოფიციალური განცხადება გაავრცელეს: „დღეს ჰიუსტონში, NRG სტადიონზე, ტექნიკური გაუმართაობის გამო ბიონსეს საფრენი მანქანა გადაიხარა. ის მალევე ჩამოიყვანეს და არავინ დაშავებულა. შოუ გაგრძელდა შეფერხების გარეშე,“ – ნათქვამია Parkwood Entertainment-ის მიერ Instagram Story-ში გამოქვეყნებულ განცხადებაში.
16 Carriages ბიონსეს Cowboy Carter-ის ტურში, როგორც წესი, სეტლისტში ბოლოს წინა სიმღერაა. ტურნე აპრილის მიწურულს დაიწყო და ივლისის ბოლოსთვის უნდა დასრულდეს. მომდევნო კონცერტი 29 ივნისს კვლავ ჰიუსტონის NRG სტადიონზე გაიმართება.
