პრისცილა პრესლი ელვის პრესლისთან 14 წლის განმავლობაში ცხოვრობდა, სანამ საბოლოოდ წყვილი ერთმანეთს დაშორდა.
დაშორებისა და მისი შემდგომი პერიოდი პრისცილასთვის რთული იყო, რის გამოც ამ თემაზე საჯაროდ არ საუბრობდა. თუმცა ახლა მის მემუარებში Softly, As I Leave You: Life After Elvis მსახიობი მკითხველს რთული, მაგრამ შთამაგონებელი თავგადასავლის დეტალებს უზიარებს მას შემდეგ, რაც როკ-ენ-როლის მეფეს დაშორდა და პირველ ადგილზე საკუთარი თავი და ქალიშვილი ლიზა მარია პრესლი დააყენა.
წიგნი უკვე ხელმისაწვდომია და მისი შეძენა Amazon-ზე სხვადასხვა ფორმატშია შესაძლებელი. მკითხველს შეუძლია ხელმოწერილი მემუარის შეძენაც.
პრისცილა ელვისს პირველად 14 წლის ასაკში შეხვდა, როცა მომღერალი 24 წლის იყო. ელვისი მაშინ აშშ-ის არმიაში გერმანიის ტერიტორიაზე მსახურობდა. დისტანციის მიუხედავად, წყვილი წლების განმავლობაში ინარჩუნებდა სასიყვარულო ურთიერთობას, 1967 წელს კი ისინი ლას-ვეგასში საიდუმლოდ დაქორწინდნენ.
მიუხედავად იმისა, რომ 1973 წელს მათი ურთიერთობის დასრულება პრისცილასთვის მტკივნეული იყო, წიგნი ხაზს უსვამს იმ გარემოებას, თუ რატომ იყო მნიშვნელოვანი მისთვის ელვისისგან წამოსვლა.
როგორც ჩანს, ელვისთან ურთიერთობისას პრისცილამ საკუთარ თავთან კავშირი დაკარგა. დაშორებამ კი მას საშუალება მისცა, თავისი თავი ხელახლა ეპოვა. წიგნში ვხვდებით სხვადასხვა მონაკვეთს პრისცილას ცხოვრების შესახებ ელვისამდე და ელვისის შემდეგ და ვიგებთ, თუ როგორ მოუწია მსახიობს ცზოვრების თავიდან დაწყება ელვისის გარდაცვალების შემდეგ, როგორც მარტოხელა დედას.
წიგნი ასევე გვიყვება, თუ როგორ აქცია პრისცილამ Graceland საერთაშორისო დანიშნულების ადგილად და როგორ დაეხმარა Elvis Presley Enterprises-ს განვითარებაში, რითაც როკ-ენ-როლის მეფის მემკვიდრეობა სრულფასოვან ბიზნესად აქცია.
მათ, ვინც ელვისის ფანია, პრისცილას მემუარები უნიკალურ პერსპექტივას უხსნის მომღერლის ცხოვრებაზე, რომლის შესახებაც მისი ყოფილი მეუღლე ჰყვება. წიგნი ასევე იძლევა მეტ კონტექსტს თავად პრისცილას ისტორიაზე მათთვის, ვინც არც ისე ბევრი იცის მისი ცხოვრებისა და კარიერის შესახებ.
