ჯგუფ „დაგდაგანის“ დაშლის შემდეგ არტისტი ცოტნე გორგოშიძის მუსიკალურ სცენას ახალი კომპოზიციით დაუბრუნდა. მისი პირველი ნამუშევარი „ღორი“ უკვე გამოქვეყნდა და როგორც თავად ცოტნე ამბობს, ეს მისთვის ახალი ეტაპის დასაწყისია.
ცოტნე გორგოშიძე – მუსიკოსი:
„ღორი“ ჩაიწერა ალექსანდრე ჩიკვატიას სტუდიაში – Altertone Records-ში. ჩიკვატიამ ტრეკზე დრამებიც შეასრულა და მიქსინგსა და მასტერინგზეც იზრუნა. ალექსანდრე ძალიან კარგი მუსიკოსი და ინჟინერია. სიმღერა ზუსტად ისეთი ჟღერადობით გამოვიდა, როგორსაც ვგეგმავდი. მიყვარს, როცა სიმღერები ძველი მატარებლებივით ყანყალებენ.
საქსოფონზე დემეტრე ღამბაშიძეა, რომელმაც ასევე ფანტასტიურად შეასრულა თავისი საქმე, მე უბრალოდ ხასიათი მივეცი. ბექ ვოკალს ჩემი მეუღლე, ნინო ასრულებს, რომელმაც ასევე ძალიან, ძალიან ბევრი იდეა მომაწოდა მუშაობისას.” – აღნიშნა ცოტნე გორგოშიძემ.
მუსიკოსის თქმით, ამ პროექტში მონაწილეები შემთხვევით შერჩეულნი არ ყოფილან: „მუსიკოსები ავარჩიე არა პოპულარობითა თუ მეგობრობით, არამედ იმის მიხედვით, რამდენად ბუნებრივად ჯდებოდნენ კონკრეტულ ტრეკში. ჩემი გამოცდილებით, ასეთი მიდგომა ყველაზე საინტერესო შედეგს იძლევა.“
„ღორი“ ცოტნე გორგოშიძის ახალი მუსიკალური პროექტის პირველი ეტაპია. სამომავლოდ კი არტისტი სხვა მუსიკოსებთან თანამშრომლობით ახალი კომპოზიციების გამოცემასაც გეგმავს.
