Doja Cat მსოფლიო ტურნეში Ma Vie გაემგზავრა. ტურნე სამშაბათს ახალ ზელანდიაში დაიწყო და უკვე დაიმსახურა გულშემატკივრის კრიტიკა.
როგორც აღმოჩნდა, ზოგი ფანი უკმაყოფილო დარჩა პირველი კონცერტის ვიდეოებით, ასევე შენიშვნები ჰქონდათ კოსტიუმების ცვლილების, სცენის დიზაინის, ვიზუალისა და შოუს დრამატურგიის მიმართაც.
„ცუდად არ ვამბობ, მაგრამ Vie ტურნე იგივე Scarlet -ია განსხვავებული კოსტიუმებით,” – დაწერა ერთ-ერთმა ფანმა, მეორემ კი იმედი გამოთქვა, რომ მუსიკოსი კრიტიკას გაითვალისწინებდა. თუმცა გრემის მფლობელმა არტისტმა მას უპასუხა: „არ გავითვალისწინებ და არც მჭირდებით.”
დოჯამ უპასუხოდ არც სხვა კომენტარები დატოვა: „მე ვაკეთებ მუსიკას მათთვის, ვინც მუსიკით ტკბება. მე არ ვარ ბროდვეის შოუ.”
მომღერალმა კიდევ რამდენიმე ფანს უპასუხა, რომლებიც მის ტურნეზე კრიტიკულ შეფასებებს წერდნენ: „მე არ ვარ თქვენი კოსტიუმირებული მაიმუნი, ჩემი ტემპი მაქვს და ყოველ ღამე წელში ვწყდები. ასე რომ, შეგიძლიათ თქვენი უსარგებლო აზრი თქვენთვის დაიტოვოთ. თქვენ არ ხართ არტისტი, თქვენ მაყურებელი ხართ.”
როგორც ჩანს, დოჯას ტურნესთვის საკმაოდ დატვირთული პროგრამა აქვს შედგენილი ჯამში 27 სიმღერით, რომელიც მის დისკოგრაფიას მოიცავს. 2026 წელს მომღერალი სამხრეთ ამერიკაში გაემგზავრება, შემდეგ ევროპაში, ოქტომბერში კი აშშ-ში დაბრუნდება.
30 წლის მუსიკოსი კვლავ აქტუალურია ჩარტებში. ის უკვე მეთორმეტედ გახდა „ბილბორდის” რადიოჩარტის ლიდერი სიმღერით Jealous Type, რომელიც მანამდე მეოთხე ადგილს იკავებდა.
