Charli xcx-ის შემოქმედებითი იდეები ფილმად იქცა. A24-მა The Moment-ის პირველი ტრეილერი წარადგინა, რომელშიც ბრიტანელი პოპვარსკვლავი თავის გამოგონილ ვერსიას თამაშობს. თიზერში გამოყენებულია როგორც არტისტის სასცენო სახელი, ისე მისი 2024 წლის ალბომი – Brat. ვიდეოში ჩარლი ემზადება თავისი პირველი მსოფლიო ტურნესთვის, პარალელურად კი პოპულარობით გამოწვეულ ზეწოლას უმკლავდება.
„როცა ვიგრძენი, რომ ხალხი ჩემით დაინტერესდა, სხვა აღარაფერს ჰქონდა მნიშვნელობა,“ – ამბობს Charli xcx ტრეილერში. „Brat-ზე მნიშვნელოვანი არაფერი იყო.“
2026 წელი ჩარლისთვის საკმაოდ აქტიური კამპანიის პერიოდი იქნება. არტისტის შესახებ აიდენ სამირის მიერ გადაღებული ფილმი კინოთეატრებში 30 იანვარს გამოვა.
ფილმში ჩარლისთან ერთად მონაწილეობენ The Idol-ის რეიჩელ სენოთი, მსახიობი ალექსანდერ სკარსგარდი და კაილი ჯენერი. The Moment სამირის სრულმეტრაჟიანი სადებიუტო ფილმია. პროექტში Charli xcx პროდიუსერის სტატუსითაც არის ჩართული.
რაც შეეხება მის სხვა კინოპროექტებს, Charli xcx-მა ემერალდ ფენელის „ქარიშხლიანი უღელტეხილის” ეკრანიზაციისთვის რამდენიმე სიმღერაც დაწერა. პირველი მათგანი – House კლიპთან ერთდ ნოემბრის დასაწყისში გამოვიდა. 33 წლის არტისტი სხვა დაანონსებულ ფილმებშიც მონაწილეობს, მათ შორის დენიელ გოლდჰეიბერის Faces of Death-ის ახალ ვერსიაში.
იხილეთ The Moment-ის ტრეილერი:
