Snoop Dogg-მა 11 დეკემბერს განაცხადა, რომ ის 2026 წლის მილან-კორტინას ზამთრის ოლიმპიურ თამაშებზე Team USA-ის ისტორიაში პირველ საპატიო მწვრთნელად დაინიშნა.
„იმ წამიდანვე, რაც პარიზში ჩავედი, USOPC-ის (ამერიკის შეერთებული შტატების ოლიმპიური და პარაოლიმპიური კომიტეტი) ოჯახში ვიგრძენი თავი. შევიგრძენი ის ენერგია, სიამაყე და სპორტის სიყვარული, რაც ამ გუნდს განსაკუთრებულს ხდის. ის, თუ როგორ ამხნევებენ გუნდის წევრები სპორტსმენებს, როგორ შთააგონებენ სპორტსმენები მსოფლიოს. პირველივე დღიდან მომნუსხა ამ სამყარომ.“ – დაწერა Snoop Dogg-მა Linkedin-ის პოსტში.
რეპერმა Team USA-ის პირველ საპატიო მწვრთნელად დანიშვნის შესახებ აღნიშნა:
„ვიქნები Team USA-ის პირველი საპატიო მწვრთნელი. ეს არის როლი, რომელიც მთლიანად სპორტსმენების მხარდაჭერას მიეძღვნება, იმის მიღმა, რასაც გულშემატკივრები სათამაშო მოედანზე ხედავენ. მე აქ ვარ, რათა ჩემი ხმა, ჩემი გული და შესაძლოა, ცოტაოდენი სიბრძნეც შევმატო ამ ყველაფერს, რათა Team USA-ს მოტივაცია ავუმაღლო, გავანათო მათი სპორტული გზა და გავამხნევო ის ადამიანები, რომლებიც მათ ოცნებებს რეალობად აქცევენ”.
ოლიმპიურ თამაშებზე ეს Snoop Dogg-ის პირველი გამოცდილება არ არის. ის ბევრს დაამახსოვრდა 2024 წლის ზაფხულის პარიზის ოლიმპიადიდან სპეციალური კორესპოდენტის ამპლუაში. გახსნის ცერემონიამდე Snoop Dogg ასევე იყო ოლიმპიური ცეცხლის მატარებელი. ჩრდილოეთ იტალიაში კი არტისტი „ორმაგ როლს“ შეითავსებს. იგი კვლავ იქნება NBC-ის გუნდში და 2026 წლის მილან-კორტინას ზამთრის ოლიმპიადის გაშუქებაშიც მიიღებს მონაწილეობას.
Snoop Dogg გაეცნობა იტალიის ღირსშესანიშნაობებსა და კულტურას, ასევე წაიყვანს სპეციალურ კონტენტს – Snoop’s Greatest Hits, სადაც საუკეთესო მომენტებს, შეჯიბრებებსა და საკუთარ ფავორიტ სპორტსმენებს გამოააშკარავებს.
„მოხარული ვარ, რომ 2026 წლის ზამთრის ოლიმპიურ თამაშებზე მილან-კორტინაში მაიკ ტირიკოსთან ერთად დავბრუნდები. ოლიმპიადა მსოფლიოში უდიდესი სცენაა და, ყველამ იცის, რომ მე სპორტის მოყვარული ვარ, მიყვარს ხალხის გაერთიანება და პოზიტიური განწყობის შექმნა. თან წავიღებ ჩემს ქურთუკებს, თოვლის შარვლებს, სათვალეებს და ციგურებს.” – განაცხადა Snoop Dogg-მა.
NBC-ზე, მილან-კორტინა 2026-ის ზამთრის ოლიმპიური თამაშები გახსნის ცერემონიით დაიწყება, რომელიც 6 თებერვალს გაიმართება. ოლიმპიადის პირდაპირი ტრანსლაცია Peacock-ზეც განხორციელდება.
