პირველ თებერვალს, ლოს-ანჯელესის Crypto.com Arena-ში გამართულ 2026 წლის გრემის დაჯილდოებაზე, ცხოვრებისეული მიღწევებისთვის განკუთვნილი ჯილდოს მისაღებად სცენაზე მოულოდნელად შერი გამოჩნდა. მასვე უნდა გამოეცხადებინა წლის ჩანაწერის ჯილდოს ნომინანტები, თუმცა, როგორც ჩანს, ეს დაავიწყდა და სცენიდან წასვლას აპირებდა: „გმადლობთ! ახლა, როგორც ჩანს, სცენიდან უნდა გავიდე…“ – მიმართა ვარსკვლავმა აუდიტორიას.
ამ მომენტზე გრემის დაჯილდოების აღმასრულებელმა პროდიუსერმა ბენ უინსტონმა ისაუბრა. შერისთან დაკავშირებით კიდევ ერთი ინციდენტი მოხდა – მან გამარჯვებულად გარდაცვლილი ლუთერ ვანდროსი გამოაცხადა, მაშინ, როცა სინამდვილეში ჯილდო კენდრიკ ლამარისა და SZA-ს Luther-ისთვის იყო განკუთვნილი. უინსტონმა Rolling Stone-ის Music Now პოდკასტში ამ ნომრისთვის მზადების პროცესზე ისაუბრა და აღნიშნა, რომ შერი მომხდარზე განაწყენებული არ ყოფილა.
უინსტონის თქმით, როგორც კი შერი სცენიდან დაიძრა, მან წამყვან ტრევორ ნოას საეთერო გადამცემით შეტყობინება გადასცა და სთხოვა, მომღერალი უკან დაებრუნებინა. კომიკოსიც ასე მოიქცა – მუსიკა ჩაირთო, შერი სცენიდან მიდიოდა, როცა ნოამ მიკროფონში თქვა: „სანამ წახვალ, შერ, იქნებ ნომინანტები მაინც გამოგვიცხადო?“
აღმასრულებელი პროდიუსერის თქმით, შერიმ იცოდა, რა მისიით იყო იქ. „მან ნამდვილად იცოდა, რისთვის იყო მოსული! ყველაფერი ავუხსენით და მითითებებშიც ეწერა, რა უნდა გაეკეთებინა!“ – უთხრა უინსტონმა Rolling Stone-ს და დაამატა, რომ შერის გრემიზე მიწვევა დიდი ხნის სურვილი იყო. „მან წარმოთქვა ძალიან ლამაზი სიტყვა, მაგრამ შემდეგ თითქოს დაავიწყდა, რომ პირდაპირ ეთერში წლის ჩანაწერი უნდა წარედგინა.“
„ვფიქრობ, სწორედ ასეთი მომენტები ქმნის დიდ მუსიკალურ დაჯილდოებებს,“ – თქვა მან. „ეს რომ ოსკარებზე მომხდარიყო, ყველა იტყოდა: ღმერთო! სრული კატასტროფა! მაგრამ ჩვენს შოუში მე ეს ძალიან მომეწონა. დროის უკან დაბრუნება რომ შემეძლოს, ისევ ამას ვისურვებდი. შერი კმაყოფილი იყო, მშვენიერი დრო გაატარა და ძალიან ლამაზი მომენტიც გამოვიდა. ცოტა არეულობაც საჭიროა – როცა ზუსტად არ იცი, რა მოხდება. დღეს ხომ ყველაფერი ზედმეტად განსაზღვრულია.“
თუმცა უინსტონმა აღიარა, რომ ცერემონიას სხვა გაუთვალისწინებელი გარემოებებიც ახლდა. „მგონია, რომ მე თვითონ დავწყევლე,“ – თქვა მან. „ერთი წუთით ჩამოვრჩებოდით გრაფიკს, რაც აქამდე არასდროს მომხდარა… და სწორედ მაშინ გამოჩნდა შერი!“
