ნოელ გალაგერი Oasis-ის ბოლო დროის მასშტაბური ტურის შემდეგ 2026 წლის BRIT Awards-ის წლის სიმღერების ავტორად დასახელდა. განცხადება ცერემონიის მანჩესტერში გადატანას ემთხვევა, ქალაქში, სადაც ნოელი და მისი უმცროსი ძმა ლიამი დაიბადნენ და გაიზარდნენ და სადაც Oasis 1991 წელს ჩამოყალიბდა. ნოელი ცერემონიას პირადად დაესწრება და ჯილდო 28 თებერვალს Co-op Live Arena-ზე გადაეცემა.
ჯილდოს ექსპერტთა ჟიური ადგენს, რომლის ბოლოდროინდელ გამარჯვებულთა შორის არიან: ედ შირანი (2022), კიდ ჰარპუნი (2023), RAYE (2024) და Charli XCX (2025).
ეს პრიზი გალაგერებისთვის ბოლო 16 წლის განმავლობაში მიღებული პირველი BRIT Award იქნება. 2010 წელს ჯგუფს ჯილდო 30 წლის წინანდელი ალბომისთვის (What’s the Story) Morning Glory? (1995 ) გადაეცა. მაშინ ლიამ გალაგერმა მიკროფონი და პრიზი აუდიტორიაში ისროლა და სცენა დემონსტრაციულად დატოვა. მოგვიანებით, გადაცემის წამყვანმა პიტერ ქეიმ ეთერში მას „იდიოტი” უწოდა.
მიუხედავად ყველაფრისა, ჯგუფის ისტორია BRIT Awards-თან მიმართებაში საკმაოდ შთამბეჭდავია. Oasis-მა პირველი ჯილდო 1995 წელს, ნომინაციაში „წლის ბრიტანული აღმოჩენა“ მოიპოვა. 1996 წლის ხმაურიან ცერემონიაზე კი, რომელიც Britpop-ის პიკს დაემთხვა, ბენდი კონკურენტ ჯგუფს, Blur-ს დაუპირისპირდა და სამი პრიზი მიიღო. 2007 წელს Oasis-ს მუსიკაში შეტანილი განსაკუთრებული წვლილისთვის საპატიო პრიზი გადაეცა. ეს გახდა მათი ბოლო BRIT Award მანამ, სანამ 2009 წელს ჯგუფი დაიშლებოდა.
2015 წელს ნოელ გალაგერმა BBC-სთან განაცხადა, რომ ჯილდოები „გაყალბებულია“ და ეს იყო „დიდ ლეიბლებს შორის გარკვეული შეთანხმების შედეგი.“ შემდეგ კი დაამატა: „ნუ მისცემთ ჩემს ნათქვამს სხვა ინტერპრეტაციას და არ დამტოვოთ ჯილდოს გარეშე. მიყვარს დაჯილდოების ცერემონიები, მთელი ეს სოციალური გარემო – ეს ძალიან სახალისოა“. BRIT Awards-ის ორგანიზატორებმა მაშინ მისი ბრალდებები უარყვეს.
Oasis-ის აღიარება Live ’25 გაერთიანებული ტურნეს შემდეგ მოვიდა, რომლის ფარგლებშიც ნოელი და ლიამი 2009 წლის შემდეგ ერთად პირველად წარდგნენ. მათ კონცერტები გამართეს დიდ ბრიტანეთში, ირლანდიაში, ჩრდილოეთ ამერიკაში, ლათინურ ამერიკასა და აღმოსავლეთ აზიაში. ყოველივე ამან კი ბენდის ძველი ალბომები ბრიტანულ ჩარტებში დააბრუნა. ნოელი ჯგუფის პირველი სამი ალბომის: Definitely Maybe (1994), Morning Glory (1995) და Be Here Now (1997) სიმღერების ერთადერთი ავტორია, რომლებიც ტურნეს სიმღერათა სიის ძირითად ნაწილს წარმოადგენდა.
BRIT Awards-ის ნომინანტების სია იანვრის ბოლოს გამოქვეყნდა. წლევანდელი დაჯილდოების ფავორიტები ოლივია დინი და ლოლა იანგი არიან, თითოეულმა მათგანმა ხუთ-ხუთი ნომინაცია მოიპოვა. სემ ფენდერი ოთხ კატეგორიაშია წარდგენილი, ხოლო სამ-სამი ნომინაცია მიიღეს დეივმა, ჯიმ ლეგაქსიმ, Wolf Alice-მა, Fred again..-მა და ლილი ალენმა. ცერემონიაზე ცოცხალი შესრულებით წარდგებიან ოლივია დინი და Wolf Alice, სადაც ასევე ჰარი სტაილზის დიდ სცენაზე დაბრუნება იგეგმება.
