ქეთი მელუამ სოციალურ ქსელში ახალი პოსტი გამოაქვეყნა. გაზიარებულ ვიდეოში დიდ ბრიტანეთში მოღვაწე ქართველი მომღერალი გიტარის თანხლებით სიმღერის „თუ ასე ტურფა იყავი” მონაკვეთს ასრულებს და მსმენელს გიტარაზე მისი შესრულების ტექნიკას ასწავლის.
„ეს სიმღერა ჩემი სამშობლოდან, საქართველოდანაა. მასში ყველაზე მეტად ის მომწონს, რომ ის უბრალოდ გაჟღენთილია ატმოსფეროთი. არსებობს სიმღერები, რომელთა მთავარი ხიბლიც სწორედ ატმოსფეროა. შესაძლოა, ეს გიტარის აწყობის დამსახურებაცაა, რომელიც ცოტა არასტანდარტულია,” – ამბობს მომღერალი ვიდეოში, რის შემდეგაც ის გამომწერებს აჩვენებს, თუ რომელი აკორდებია საჭირო სიმღერის შესასრულებლად.
ვიდეოს აღწერაში კი ვკითხულობთ: „ჩემი ერთ-ერთი საყვარელი ქართული სიმღერა „თუ ასე ტურფა იყავი” ექვს აკორდად. ეს სიმღერა ტრადიციულ ქართულ სიმებიან საკრავზე სრულდება, ამიტომ მისი შესაბამისი განწყობის გადმოცემა დასავლურ, მეტალის სიმებიან გიტარაზე გარკვეულ ძიებას მოითხოვდა. განსაკუთრებული მადლობა ტიმ ჰარისს, რომ გიტარის საუკეთესო ჟღერადობის პოვნაში დამეხმარა.”
„თუ ასე ტურფა იყავი” შესულია ქეთი მელუას 2016 წლის ალბომში In Winter (Special Edition). მუსიკის ავტორია ანზორ ერქომაიშვილი, ტექსტი ნათელა ონაშვილს ეკუთვნის. სიმღერა ცნობილი ჰამლეტ გონაშვილის შესრულებით გახდა.
