5 ივლისს ფესტივალი Tbilisi Open Air დაიხურა. ფინალურ საფესტივალო დღეს მთავარი სცენა მუსიკალურმა პროექტმა „ლექსო რატიანის ბედმა“ გახსნა. ლექსო რატიანმა სცენიდან სოლიდარობა გამოუცხადა საპროტესტო მოძრაობის დროს დაკავებულ მოქალაქეებს, რომლებიც ამჟამად პატიმრობაში იმყოფებიან.
ამის შემდეგ სცენაზე პროექტი „ბაჩო ჯიქიძე და ესთეტი ბიჭები“ გამოვიდა, მოგვიანებით კი მსმენელის წინაშე წარდგა ჯგუფი Tape Visitors – AlterVision-ის მუსიკალური კონკურსის, Tbilisi Newcomers 2024-ის გამარჯვებული ბენდი.
ფოტო: ნინუცა კაკაბაძე/Billboard Georgia
მთავარი სცენის მუსიკალური პროგრამა ჯგუფმა „არამ“ გააგრძელა, რომელმაც მსმენელისთვის კარგად ნაცნობი ჰიტები შეასრულა. საავტორო სიმღერებთან ერთად, ჯგუფმა ირაკლი ჩარკვიანის „სულს მოგცემ“ შეასრულა. სცენაზე ასევე გაჟღერდა ახლახან გარდაცვლილი ამერიკელი არტისტის, Oliver Tree-ს ტრეკი, სახელწოდებით Miss You. ბენდის ფრონტმენმა, ზურა ჯავახიამ ასევე მხარდაჭერა გამოუცხადა საპროტესტო ტალღისას დაკავებულ მოქალაქეებს.
ფოტო: ნინუცა კაკაბაძე/Billboard Georgia
ამის შემდეგ, Tbilisi Open Air-ის მთავარ სცენაზე საერთაშორისო ჰედლაინერი – 2017 წელს ბელარუსში ჩამოყალიბებული პოსტ-პანკ ჯგუფი Molchat Doma გამოვიდა. მიუხედავად იმისა, რომ მათი შემოქმედება რუსულენოვანია, ბენდს საერთაშორისო მუსიკალურ სივრცეში მსმენელის დიდი აუდიტორია ჰყავს.
ფოტო: ნინუცა კაკაბაძე/Billboard Georgia
Molchat Doma-ს შემდეგ სცენა დღის მთავარმა ჰედლაინერმა – 1995 წელს ბელგიაში შექმნილმა Hooverphonic-მა დაიკავა. ჯგუფის მუდმივი წევრები, დამფუძნებლები და პროდიუსერები ალექს კალიე და რაიმონდ გირტსი არიან. ბენდმა წლების განმავლობაში რამდენჯერმე შეიცვალა ვოკალისტი ქალი, თბილისში კი მსმენელის წინაშე მათი ჟღერადობისთვის ყველაზე დამახასიათებელი ხმა – ჰაიკე არნარტი (Geike Arnaert) წარდგა.
პერფორმანსის დაწყებისას ალექს კალიე აუდიტორიას ქართულად მიესალმა: „უნდა ვაღიარო, სადაც გამოვდივარ, ხუთ წინადადებას მაინც ვამბობ ადგილობრივ ენაზე. თქვენ გაიმარჯვეთ, ამის გაკეთება აქ შეუძლებელია. პირველად ვართ თბილისში და ძალიან ბედნიერი ვარ აქ ყოფნით. ბევრს არ ვისაუბრებთ, რადგან მხოლოდ საათი და 15 წუთი გვაქვს, ამიტომ დავიწყებთ დაკვრას. ეს იქნება მუსიკალური მოგზაურობა, რადგან შევასრულებთ სიმღერებს ჩვენი მთელი მუსიკალური კარიერიდან“.
ფოტო: ნინუცა კაკაბაძე/Billboard Georgia
Hooverphonic-ის სეტლისტი არაერთ მსოფლიო ჰიტს მოიცავდა, მათ შორის, ქართველი მსმენელისთვის განსაკუთრებით საყვარელ სიმღერას – Mad About You.
საფესტივალო დღის კულმინაციად Kordz-ის, Mechanical Rainbow-სა და გოგონათა გუნდ „ანა-ბანას“ ერთობლივი გამოსვლა იქცა, რომლითაც Tbilisi Open Air 2026 ოფიციალურად დაიხურა. Kordz-მაც წინა ქართველი გამომსვლელების მსგავსად, სოლიდარობა გამოუცხადა საპროტესტო ტალღის დროს დაკავებულ მოქალაქეებს: „თავისუფლება ყველას, ვინც თავისუფლებისთვის იბრძვის და ამისთვის ციხეში ზის. სანამ ისინი თავისუფლები არ არიან, რასაც უნდა ვაკეთებდეთ, სულ თავში უნდა გვქონდეს, რომ ამ სიტუაციაში ვცხოვრობთ“.
ფოტო: გიო მაჭავარიანი/Billboard Georgia
კოლაბორაციული გამოსვლა დასრულდა სიმღერით – „ჩემო კარგო ქვეყანავ“, რასაც აუდიტორიის მქუხარე ოვაციები მოჰყვა.
ასე დახურა Tbilisi Open Air-მა თავისი მე-15 საიუბილეო სეზონი და მსმენელს მომავალ წლამდე დაემშვიდობა.
