კეტი პერიმ, რომელიც American Idol-ის ჟიურის წევრია, კონკურსის ახალ ეპიზოდში ნუცა ბუზალაძეს კრიტიკული შენიშვნა მისცა, რის გამოც შოუს ერთგული გულშემატკივრების კრიტიკა დაიმსახურა. აღსანიშნავია, რომ American Idol-ის დაწყებიდან დღემდე, ქართველი მონაწილე შოუს ფანების ერთ-ერთ რჩეულ მონაწილედ იქცა.
ნუცა ბუზალაძე მონაწილეებს შორის ცნობილია, როგორც კონკურსანტი, რომლის მუსიკალური ნომრები შოუს ელემენტებით არის გაჯერებული, ხოლო შესრულება განსაკუთრებული ენერგიულობით ხასიათდება. ბოლო საკონკურსო კონცერტზე კი, კეტი პერიმ აღნიშნა, რომ ნუცას შესრულება მეტისმეტად „კაშკაშა“ იყო.
„ნუცა, ყოველთვის როცა სცენაზე გამოდიხარ, ბრჭყვიალა ბომბივით ხარ. ის, რაც შენგან პერსონალურად მომინდებოდა შემდეგში დამენახა, არ არის ეს ბზინვარება. ვიცი, რომ ეს რთული იქნება“ – აღნიშნა კეტი პერიმ.
აუდიტორიაში მყოფმა ფანებმა ეს კომენტარი უარყოფითად მიიღეს და კეტი პერის არ დაეთანხმნენ. მათ უკმაყოფილება ხმამაღალი შეძახილებით გამოხატეს. ამის საპასუხოდ, ჟიურის კიდევ ერთმა წევრმა, ლუკ ბრაიანმა ყურადღება აუდიტორიის რეაქციაზე გაამახვილა. Ბრაიანმა კეტი პერის უთხრა, რომ ამ კომენტარის გამო, მან ხმამაღალი კრიტიკა დაიმსახურა.
„პირველად ექვს სეზონში“ – აღნიშნა პასუხად კეტი პერიმ და ამის შემდეგ, საკუთარი პოზიცია განმარტა: „მე იმას ვგულისხმობ, რომ მსურს, სცენარი შეცვალო. გვინდა, შენს გულში ჩავიხედოთ, ვისურვებდი ეს მენახა და შესაძლოა, ამერიკასაც იგივე სურდეს.“
ნუცა ბუზალაძემ კეტი პერი დაიცვა და აღიარა, რომ საჭიროა ტემპის დაგდება ისწავლოს. აღსანიშნავია, რომ როდესაც 25 წლის კონკურსანტი ჟიურის წინაშე ლას ვეგასში პირველ შესარჩევ მოსმენაზე წარდგა, მისმა გამოსვლამ განსაკუთრებული ყურადღება სწორედ დამახასიათებელი ენერგიულობით მიიქცია.
„ჩემი პრობლემა ის არის, რომ ყოველთვის ენერგიის დიდ მოზღვავებას ვგრძნობ“ – აღიარა ნუცამ ამ შოუმდე რამდენიმე ხნით ადრე, როცა ჯერ კიდევ „ჰოლივუდის კვირის“ სოლო რაუნდისათვის ემზადებოდა.
ნახეთ ნუცა ბუზალაძის გამოსვლა American Idol-ის ახალ ეპიზოდში:
