ძლიერმა წვიმამ და ელჭექმა, ამავე დროს კი მეტროს სამუშაო საათებმა ბიონსეს კონცერტს ვაშინგტონში საფრთხე შეუქმნა. თუმცა Queen Bey ვერც ამინდმა და ვერც ქალაქის მეტროს განრიგმა შეაჩერა.
ცუდი ამინდის გამო ბიონსეს კონცერტის დაწყების დრომ საგრძნობლად გადაიწია. ამიტომ მომღერალმა 100 000 დოლარი გადაიხადა, რომ მეტროს სამუშაო განრიგი ერთი საათით გაეხანგრძლივებინა, რათა ფანებს დაგვიანებული კონცერტის შემდეგ სახლში დაბრუნება შესძლებოდათ. ვაშინგტონის მეტროს ხელმძღვანელობის განცხადებით, 100 000 დოლარი ფარავს 98 მეტროსადგურის სამუშაო საათების გახანგრძლივების ხარჯებს.
ბიონსემ, ამინდის მიუხედავად, მაყურებლისთვის კიდევ ერთი საოცარი შოუს მოწყობა შეძლო. მომღერალმა ვაშინგტონის აუდიტორია Everybody on mute war-ის გამარჯვებულად გამოაცხადა. ეს არის გამოწვევა, რომლის დროსაც აუდიტორია ჩუმდება, როცა ბიონსე მღერის ფრაზას კომპოზიციიდან Energy: Look around/ Everybody on mute.
ბიონსეს მიმდინარე მსოფლიო ტურნე მის ბოლო ალბომს Renaissance-ს ეძღვნება, რომელიც Billboard-ის 200 ალბომის ჩარტის ლიდერი გახდა.
