ქართულ მუსიკალურ სცენაზე დროსთან ერთად ჩნდებიან ახალი შემსრულებლები, ბენდები, მუსიკალური პროექტები. თითოეული მათგანი ცდილობს ადგილობრივ ინდუსტრიაში გამოკვეთილი ნიშა დაიმკვიდროს და მსმენელს საკუთარი მუსიკალური იდენტობა გააცნოს. ერთ-ერთ ასეთ ახალბედა ბენდად შეგვიძლია Process დავასახელოთ, რომელმაც მოკლე დროში ერთგული აუდიტორია გაიჩინა. ბენდი 2022 წელს რუსთავში ჩამოყალიბდა და ამავე წელს Newcomers-ის გამარჯვებული გახდა. მას შემდეგ Process არაერთი ფესტივალის და მუსიკალური სივრცის სცენაზე წარდგა, მათ შორის იყო ROKVA და Tbilisi Open Air. 2023 წელს კი ბენდმა პირველი ალბომი სახელწოდებით CONFUSION გამოუშვა.
Process-ის წევრები Gen Z თაობის წარმომადგენლები არიან. ჯგუფის მუსიკალური ჟღერადობა როკის და ზოგადად, მუსიკის მოყვარული ყველა თაობისათვის საინტერესოა. ბენდის ამჟამინდელ შემადგენლობაში არიან: ცოტნე იოსებაშვილი (ფრონტმენი), ლუკა ჰეილი (გიტარა), ნიკა ლომიძე (ბასი), ლუკა ქიმერიძე (ლიდ გიტარა) და საბა ზაქარეიშვილი (დრამი).
Process-ის ზუსტი ჟანრობრივი მიმართულების განსაზღვრა რთულია, ის სხვადასხვა ელემენტს მოიცავს, თუმცა ზოგადი შეფასებით, შესაძლოა არტ-როკის შემსრულებელ ბენდად მოვიხსენიოთ.
ლუკა ჰეილი:
„აქამდე რა სიმღერებიც გამოვუშვით, მათში უფრო მეტად როკ-ენ-როლის ჟღერადობაა. თუმცა, დროსთან ერთად, მუსიკალური გავლენები შეიცვალა და ახალი ტრეკები მეტად არტ-როკის ჟანრისაკენ წავიდა.“
ცოტნე იოსებაშვილი:
„დღესდღეობით უფრო მეტად კომპლექსური მუსიკა მოგვწონს. ჩვენთვისაც რთულია დავასახელოთ ჟანრი, რომელსაც ვუკრავთ, რადგან ჩვენი მუსიკა უფრო მეტად ემოციებიდან გამომდინარეობს და ამიტომ ჟანრობრივადაც მრავალფეროვანია. შესაძლოა მძიმე მუსიკაც დავწეროთ, შესაძლოა პირიქით, მსუბუქი და მელოდიური. ჟანრობრივი ბარიერები არ გვაქვს. ალბათ, ამ ყველაფრის გათვალისწინებით, ყველაზე ახლოს არტ-როკთან ვართ.“
როგორც Process-ის წევრები ამბობენ, მუსიკალური ექსპერიმენტების მოყვარულები არიან. საკუთარ შემოქმედებას უფრო მეტად ინდივიდუალურ კომპოზიციებად აღიქვამენ, ვიდრე ჟანრობრივ მიმართულებად, რომელსაც მიჰყვებიან. გარდა იმისა, რომ ეს მიდგომა არტისტებს მეტ თავისუფლებას აძლევს, უშუალოდ შემოქმედებაც უფრო დიდი აუდიტორიისათვის არის მიმზიდველი და საინტერესო. რაც შეეხება იდეურ ინსპირაციას, Process-ის ტექსტები ემოციებზე, ადამიანის თვითგამორკვევასა და საკუთარი თავის ძიებაზეა. ხშირად სწორედ ეს განაპირობებს ტრეკების მელანქოლიურ ხასიათს.
ბუნებრივია, რომ Process-ის ერთგული მსმენელის აუდიტორიას ძირითადად ახალგაზრდები შეადგენენ. როგორც ჯგუფის წევრები ამბობენ, კონცერტიდან კონცერტამდე მსმენელის რიცხვი იზრდება და ეს სცენიდანაც შესამჩნევია.
ლუკა ჰეილი:
„2022 წლის შემდეგ აქტიურად გამოვდივართ სცენაზე და რაც ყველაზე მეტად გვახარებს, ერთი და იმავე ადამიანების დანახვაა. უკვე გვყავს მსმენელი, რომელიც ყველა ლაივზე დაგვყვება. ვფიქრობ, ჩვენს მსმენელთან ბენდის თითოეულ წევრს ბევრი საერთო გვაქვს. გარდა იმისა, რომ ერთი თაობა ვართ, ინტერესებიც მსგავსია. ჩვენი აუდიტორია შედგება იმ ადამიანებისაგან, ვინც ცდილობს გაიგოს, რა უნდა ცხოვრებაში და საკუთარი თავი იპოვოს.“
სოციალური მედიის ეპოქის თავისებურებების გათვალისწინებით, ხელოვნების ნებისმიერ მიმართულებაში განსაკუთრებული მნიშვნელობა შემოქმედებითი იდენტობისაგან ბრენდის შექმნამ შეიძინა. ეს განსაკუთრებით კარგად აქვთ გაცნობიერებული ახალი თაობის ხელოვანებს და ამ მხრივ არც Process არის გამონაკლისი. სასცენო ვიზუალსა თუ ფოტოსესიების ესთეტიკაში გამორჩეული სტილი იკვეთება, რაც ბენდის წევრების თქმით, ბუნებრივი და ავთენტურია.
როგორც Process-ის წევრები „Billboard საქართველოსთან“ ინტერვიუში ამბობენ, მუსიკა მათთვის არა გართობა, არამედ ძირითადი საქმეა და მომავალსაც სწორედ ამ ინდუსტრიასთან აკავშირებენ.
ცოტნე იოსებაშვილი:
„მუდმივად ვრეპეტიციობთ. გარდა იმისა, რომ საბოლოოდ კარგი კომპოზიციით გვირგვინდება, ეს ჩვენთვის ერთმანეთთან დროის გატარების საშუალებაა. ჩვენ ახლო მეგობრები ვართ და ეს სიახლოვე მუსიკალურ შემოქმედებაშიც იგრძნობა და სცენაზეც.“
18 ნოემბერს, Process მსმენელს ახალ რელიზს წარუდგენს. Junk Keeper – ასე ჰქვია სინგლს, რომელსაც ბენდი ასევე 18 ნოემბერს, კლუბში APRILI გამართულ ლაივზე შეასრულებს.
მანამდე კი, მოუსმინეთ Process-ის სადებიუტო ალბომს – CONFUSION:
