ვოლფგანგ ამადეუს მოცარტის გარდაცვალებიდან 230 წელიწადში კომპოზიტორის ახალი ნაწარმოები გამოქვეყნდა. მუსიკალური ექსპერტები მიიჩნევენ, რომ აქამდე უცნობი ნამუშევარი, რომელიც გერმანიის ბიბლიოთეკაში აღმოაჩინეს, მოცარტმა თინეიჯერობის ასაკში დაწერა.
12-წუთიანი ნაწარმოები Ganz kleine Nachtmusik 1760-იანი წლებით თარიღდება. აღწერის მიხედვით, ის მოიცავს შვიდ ნაწილს და შექმნილია სიმებიანი ტრიოსთვის. მკვლევრებმა ნაწარმოები ლაიფციგის მუსიკალურ ბიბლიოთეკაში აღმოაჩინეს, როცა მოცარტის ყველა არსებული ნაწარმოების ქრონოლოგიური კატალოგის, იგივე „კოჰელის კატალოგის” ბოლო გამოცემაზე მუშაობდნენ.
ნაწარმოები პირველად სიმებიანი ტრიოს მიერ ზალცბურგში 19 სექტემბერს სწორედ კოჰელის კატალოგის ბოლო გამოშვების პრეზენტაციაზე შესრულდა. 21 სექტემბერს კი მისი გერმანული პრემიერა ლაიფციგის ოპერაში შედგა.
მიუხედავად იმისა, რომ აღმოჩენილი ხელნაწერის კალიგრაფია პირადად მოცარტს არ ეკუთვნის, მკვლევრების აზრით, ეს უნდა იყოს ორიგინალის ასლი, რომელიც 1780 წელს გაკეთდა.
„რადგანაც შთაგონება, აშკარაა, რომ მოდიოდა მოცარტის დისგან, ალბათ უნდა წარმოვიდგინოთ, რომ სწორედ ის ინახავდა ამ ნაწარმოებს, როგორც სახსოვარს თავისი ძმისგან,” – ნათქვამია მოცარტის საერთაშორისო ფონდის მიერ გავრცელებულ განცხადებაში ახლად აღმოჩენილი ნაწარმოების შესახებ, რომელიც უნიკალურია, რადგან აქამდე მკვლევრები ფიქრობდნენ, რომ მოცარტი ძირითადად საფორტეპიანო მუსიკის, არიებისა და სიმფონიების კომპოზიტორი იყო.
კოჰელის კატალოგში კომპოზიციის შესახებ ვკითხულობთ, რომ ის „შემონახულია ერთადერთ წყაროში, რომელიც გვთავაზობს, რომ ნაწარმოები შექმნილია მოცარტის პირველ მოგზაურობამდე იტალიაში” 1769 წლის დეკემბერში, როცა ვუნდერკინდი კომპოზიტორი მხოლოდ 13 წლის იყო.
