11 იანვარს, ქალაქ რუსთავში, ქვეყანაში მიმდინარე საპროტესტო პროცესების სოლიდარობის ნიშნად, მუსიკალური ღონისძიება გაიმართება. ღონისძიებას კომპანია RETCO და Tbilisi Open Air წარადგენს.
როგორც ღონისძიების ორგანიზატორები აღნიშნავენ, მუსიკალური საღამო ბიზნესისა და სახელოვნებო სფეროს თანამშრომლობის ფორმაა, რომლის მიზანი საქართველოში მიმდინარე პროტესტის ძირითადი მოთხოვნების მხარდაჭერა, საზოგადოების კიდევ უფრო დიდი ნაწილისათვის გაზიარება და მათი დედაქალაქს გარეთ გავრცელებაა.
„RETCO-სა და Tbilisi Open Air-ის პროექტის პირველი ღონისძიება ქალაქ რუსთავში ჩატარდება, სადაც კიდევ ერთხელ მკაფიოდ გავაჟღერებთ, რომ სრულიად ვიზიარებთ და სოლიდარულები ვართ პროტესტის ორი უმთავრესი მოთხოვნისადმი:
ახალი, სამართლიანი არჩევნები, საპროტესტო პერიოდში პოლიტიკური ნიშნით დაკავებული ადამიანების გათავისუფლება,” – ვკითხულობთ ღონისძიების ანონსში.
მუსიკალურ საღამოზე მსმენელის წინაშე წარდგებიან: Process,4D Monster Lobsters, ნიკა ჩოხელი, Outsider, Mechanical Rainbow, Killages, „მწვანე ოთახი“, „გამოუვალი მდგომარეობა“, ჯგუფი „ყველა“ და ნინო ქათამაძე.
ღონისძიების შესახებ დეტალურ ინფორმაციას გაეცანით ბმულზე.
