Ye, იგივე კანიე უესტი რეპერებს ურჩევს, კენდრიკ ლამართან დაპირისპირებაზე ხელი აიღონ. უესტმა ამაზე ჯასტინ ლაბოისთან ერთად, The Download-ის ინტერვიუში ისაუბრა. ეპიზოდი, რომლის მიწვეული სტუმარი Ye იყო, 4 თებერვალს გამოქვეყნდა. საუბრისას კანიე უესტმა ლამარისადმი პატივისცემა გამოხატა, თუმცა, იმავდროულად, თავდაჯერებულმა აღნიშნა, რომ რეპის რინგზე მის დამარცხებას შეძლებს, რადგან თავად „გენიოსია.”
„თუ კენდრიკ ლამარს რეპში დაუპირისპირდები, წააგებ. Street Fighter-ში ჩუნ-ლის რომ აირჩევ, აქვს ერთი კონკრეტული დარტყმა, რომელსაც ვერაფერს მოუხერხებ, რაც არ უნდა სცადო,” – თქვა უესტმა. „ეს რთული დავალებაა, მაგრამ ალბათ… მე ფსიქოპათი გენიოსი ვარ და ეს სრულიად შესაძლებელია.“
მიუხედავად იმისა, რომ Ye-ს სჯერა, კენდრიკმა დრეიკი დაამარცხა, უესტი ვარაუდობს, რომ 6 God-ის შემსრულებელი არტისტის დაბრუნება 2025 წელს არ უნდა გამოირიცხოს.
„ესე იგი, კენდრიკმა დრეიკი გაანადგურა – ის მკვდარია,“ – აღნიშნა The Download-ის ინტერვიუერმა ჯასტინ ლაბოიმ. Ye დაეთანხმა, თუმცა ფიქრობს, რომ ეს საბოლოო მოცემულობა არ არის და დრეიკი NBA-ის ვარსკვლავ სტეფ კარის შეადარა. „კი, ამ ეტაპზე. მაგრამ სტეფ კარის ვერასდროს ჩამოწერ. ამ კაცმა, შეიძლება, ერთ სიმღერაში 200 ქულა აიღოს,” – უპასუხა კანიე უესტმა.
Ye-მ მის ე.წ. „მეტოქე-მეგობარ“ დრეიკს მოუწონა ის, რომ „ალგორითმში რაღაც შეცვალა და [თავისი მუსიკა] ახალ სიხშირეზე გადაგვირთო.“
კანიე უესტი გასულ წელსაც ჩაერთო დრეიკისა და კენდრიკის დაპირისპირებაში, როცა Like That-ის რემიქსში დრეიკს შეეხო.
იხილეთ კანიე უესტის სრული ინტერვიუ:
