ქართული მუსიკალური დუეტი Eko & Vinda Folio ბერლინში დაფუძნებულ სოციალურ-კულტურულ ფესტივალში, „განთიადში“ მიიღებს მონაწილეობას. მუსიკოსები მსმენელის წინაშე 24 მაისს წარდგებიან Neue Zukunft-ში, რომელიც თანამედროვე სახელოვნებო ღონისძიებების ვენიუა.
Eko & Vinda Folio პოსტ-პანკ დუეტია, რომელიც 2012 წელს ერეკლე დეისაძემ და თემო ეზუგბაიამ დააარსეს. დუეტის პირველმა სინგლმა – „სისტემა უნდა დაინგრეს“ მსმენელის დიდი მოწონება დაიმსახურა და მალევე მოჰყვა მეორე სინგლი – „აგურით ხელში“. ამ ნამუშევრებმა არტისტების პროექტს პოპულარობა მოუტანა და ჯგუფს ოფიციალური სახე მიეცა. Eko & Vinda Folio-მ მალე ჩაწერა მათი ყველაზე ცნობილი სიმღერა – „რაც მამას უნდა“, რომლის ვიდეორგოლიც საბა შენგელიამ გადაიღო.
დუეტის შემოქმედების მიმართ ინტერესი საქართველოს ფარგლებსაც გასცდა და მათი მუსიკით ფრანგული ლეიბლი Talitres დაინტერესდა. სწორედ ამ ლეიბლზე 2018 წელს გამოიცა ჯგუფის სიმღერა „შენ ანათებ“. მალევე, 2019 წელს გამოვიდა მათი სადებიუტო ალბომი სახელწოდებით „თერაპია“. ამას მოჰყვა ჯგუფის პირველი საკონცერტო ტური საფრანგეთში. 2023 წელს Eko & Vinda Folio-მ ამ დროისთვის ბოლო, მესამე ალბომი გამოსცა.
რაც შეეხება პროექტ „განთიადს“, ფესტივალი ბერლინში მცხოვრები ემიგრანტების დამოუკიდებელმა ჯგუფმა დააფუძნა. ორგანიზატორები ცდილობენ, საკუთარ კულტურებთან დაკავშირებულ სოციალურ და პოლიტიკურ პროცესებში ამ ფორმით ჩაერთონ. როგორც „განთიადის“ დამფუძნებლები ამბობენ, ამ პროექტით სურთ, ადგილობრივ გარემოში „შექმნან სივრცე, სადაც ამ კულტურების ხმა ისმის“.
