დრეიკი ყოველთვის საჯაროდ ამბობდა, რამდენად აფასებს 2Pac-ს. როგორც ჩანს, მან ახლახან კიდევ ერთი ნივთი შეიძინა, რომელიც ტრაგიკულად დაღუპულ რეპერს ეკუთვნოდა.
დრეიკმა 24 აგვისტოს ინსტაგრმზე ფოტო გამოაქვეყნა, სადაც, სავარაუდოდ, 2Pac-ის 1996 წლის Death Row Records-ის გულსაკიდია გამოსახული. ლეიბლის ლოგო ძვირფასი თვლებით არის მოჭედილი, ხოლო ოქროს მედალიონის უკანა მხარეს აწერია: „All Eyez on YOU 1996.“
დრეიკის პოსტს თან ერთვოდა All Eyez On Me-ს ყდის ფოტო, სადაც თუფაქი ასეთივე გულსაკიდს ატარებს.
დრეიკის პოსტი მისმა არაერთმა კოლეგამ მოიწონა, მათ შორის არიან: Moneybagg Yo, Gashi და Gillie Da Kid. ერთ-ერთმა ფანმა გაოცებაც გამოხატა: „მთელი მსოფლიო 1996 წლიდან ფიქრობს, სად არის თუფაქის ორიგინალი Death Row Records-ის ძეწკვი. შოკში ვარ!”
ჯერ კიდევ 2023 წელს დრეიკმა გაამხილა, რომ ფლობდა ძვირფას სამკაულს – გვირგვინის ფორმის ბეჭედს, რომელიც 2Pac-ს ეკუთვნოდა. Sotheby’s-მა დაადასტურა, რომ დრეიკმა ეს სამკაული 1.1 მილიონ დოლარად შეიძინა. აღნიშნული ბეჭედი თუფაქს მისი ცხოვრების უკანასკნელ საჯარო გამოჩენაზე – 1996 წლის MTV Video Music Awards-ზე ეკეთა.
ამჟამად დრეიკი ევროპაში PARTYNEXTDOOR-თან ერთად ტურნეს მართავს. 25 აგვისტოს არტისტები ერთად წარდგებიან კოპენჰაგენში, მოგვიანებით კი მილანში ორ შოუს გამართავენ.
ნახეთ დრეიკის პოსტი:
