ტეილორ სვიფტი და ტრევის კელსი დაინიშნენ. ახალი ამბავი თავად წყვილმა გაამხილა.
პოპვარსკვლავმა და Super Bowl-ის ფეხბურთელმა სასიხარულო ამბავი ინსტაგრამის საერთო პოსტით გააზიარეს. გავრცელებულ ფოტოებში ვხედავთ მუხლზე დამდგარ კელსსა და ემოციებით სავსე სვიფტს, რომელიც საქმროს სახეზე ეფერება. „თქვენი ინგლისურისა და ფიზკულტურის მასწავლებლები ქორწინდებიან,” – ვკითხულობთ პოსტის აღწერაში. ფოტოებში ასევე ჩანს სვიფტის ნიშნობის ბეჭედი მასიური ბრილიანტის ქვით.
წყვილის ნიშნობის პოსტს რეკორდული მასშტაბის რეაქციები მოჰყვა. „მეტას” მიერ „ბილბორდისთვის” გაზიარებული მონაცემების მიხედვით, პოსტმა ერთ საათში 14 მილიონი ლაიქი და 452 000 გაზიარება დააგროვა.
მათ შორის, ვინც პოსტი დაალაიქა, არიან სვიფტის ცნობილი მეგობრებიც: „ლორდი”, Ice Spice, გრეისი აბრამსი, ჯეკ ანტონოფი და საბრინა კარპენტერი – რომ აღარაფერი ვთქვათ სვიფტის ურიცხვ გულშემატკივარზე. წყვილის ნიშნობის ფოტოები გააზიარეს ასევე ავრილ ლავინმა, Jelly Roll-მა, ჩარლი პუთმა და სხვა ცნობილმა სახეებმა. „ეს ცხოვრების საუკეთესო ეტაპია.” „სიყვარული გიხდებათ,” – უწერენ წყვილს.
ახალ ამბავს გამოეხმაურა კელსის საფეხბურთო ოჯახიც. Chiefs -ის ფეხბურთელმა და კელსის მეგობარმა პატრიკ მაჰოუმსმა ინსტაგრამზე ნიშნობის პოსტი გააზიარა, მისმა მეუღლე ბრიტანიმ კი დაწერა: „ორი ყველაზე გულწრფელი ადამიანი შეხვდა და ერთმანეთი შეუყვარდათ. უბრალოდ ძალიან ბედნიერები ვართ მათ გამო.”
ნიშნობა წყვილის ორწლიან რომანს მოჰყვა. პირველად კელსმა სვიფტის შესახებ 2023 წელს თავის და თავისი ძმის ერთობლივ პოდკასტში New Heights ისაუბრა. ფეხბურთელი მაშინ გულდაწყვეტილი ჰყვებოდა, თუ როგორ ვერ მოახერხა კანზასის კონცერტზე სვიფტისთვის ცნობილი „მეგობრობის სამაჯურის” გაკეთება, რომელზეც მისი ტელეფონის ნომერი იყო დატანილი.
ამ ეპიზოდიდან ცოტა ხანში სვიფტი პირველად Kansas City Chiefs-ის თამაშს დაესწრო. დანარჩენი კი უკვე ისტორიაა. წრის შემკვრელი მომენტი ტეილორის სტუმრობა იყო New Heights-ში, სადაც მან თავისი ამბავი გააზიარა, თუ როგორ შეუყვარდა ფეხბურთელი და ასევე ისაუბრა მომავალ ალბომზე The Life of a Showgirl.
.
