გიგი ჯანგულაშვილმა, სასცენო სახელით Gigilow, ახალი ალბომი Rustavelli წარადგინა. ის 8 ტრეკისაგან შედგება და უკვე ხელმისაწვდომია მუსიკალურ სტრიმინგ პლატფორმებზე.
Gigilow რეპერია რუსთავიდან, რომლის ჟანრობრივი მიმართულება ძირითადად underground trap-ს მოიცავს.
„პირველი შეხება მუსიკასთან ჩემსავე უბანში, 15-16 წლის ასაკში მქონდა, როდესაც მთელი დღეები ვუსმენდით Wu-Tang Clan-ის მუსიკას. მათი შთაგონებით, სამმა მეგობარმა – მე, DMC-მ და Hamoon-მა – გადავწყვიტეთ, ჰიპ-ჰოპ iგაერთიანება ჩამოგვეყალიბებინა, სახელწოდებით RU13. ჩემთვის მუსიკა ყოველთვის ბევრს ნიშნავდა – ეს იყო თერაპია, თვითგამოხატვის და გადარჩენის გზა. მე მქონდა ოცნება, რომელიც აუხდენელი დარჩა, ჰიპ-ჰოპმა კი მომცა შანსი, ჩემი ისტორია ისევ მნიშვნელოვნად მექცია. მუსიკის კეთება დავიწყე ჩემს თანაქალაქელ პროდიუსერ Denivarlevy-სთან ერთად. ერთმანეთს ჩვენმა საერთო მეგობარმა დაგვაკავშირა და მეორე დღესვე დავიწყეთ პირველი დემო ტრეკების გაკეთება,” – ამბობს Gigilow ჟურნალ Billboard Georgia-სთან საუბრისას.
ფოტო: data.lens
არტისტის ნამუშევრები შინაარსობრივად რეალურ, ყოველდღიურ ცხოვრებას ეხმიანება – ავტორის გამოცდილებებს, გამოწვევებს და ადამიანებს, რომლებმაც გავლენა მოახდინეს მასზე.
„ვწერ ტკივილზე, ბრძოლაზე, დამარცხებაზე, მაგრამ ასევე იმედზე, გადარჩენასა და გამარჯვებაზე. თითოეული ტრეკი ჩემი ამბის, შეცდომებისა და გაკვეთილების სარკეა. ჩემი მიზანია, რომ მსმენელს ვაჩვენო – მიუხედავად სირთულისა, ყოველთვის არსებობს გზა ტრიუმფისკენ.”
რაც შეეხება ახალ ალბომს – Rustavelli, არტისტის თქმით, ის ერთგვარი სულიერი და შემოქმედებითი მოგზაურობაა. ჩანაწერი მუსიკალურად სხვადასხვა სტილის ტრეკებს აერთიანებს, რაც მრავალფეროვან ნამუშევარს ქმნის. როგორც Gigilow ინტერვიუში ამბობს, Rustavelli-თ მას სურს, „მსმენელს მოუყვეს ნამდვილი, სიღრმისეული ისტორია და აჩვენოს, რომ ყოველი სირთულე შეიძლება გახდეს ახალი წარმატების წინაპირობა ან შემოქმედებითი ენერგიის წყარო”.
ფოტო: data.lens
ალბომის სახელწოდებას არტისტის შემოქმედებით პერსონასთან მჭიდრო კავშირი აქვს – მუსიკოსი ცხოვრობს რუსთავში, შოთა რუსთაველის ქუჩაზე და როგორც თავად ამბობს, სწორედ აქ დაიბადა მისი შემოქმედება. „ამასთან ერთად, ჩემი დიდი ინსპირაციის წყაროა შოთა რუსთაველი, ამიტომაც დავარქვი ალბომს Rustavelli,” – აღნიშნავს არტისტი.
ალბომი TMH Records-შია ჩაწერილი. პროდიუსინგზე იმუშავეს არტისტებმა: Denivarlevy, Icynightmare, H3rrocidebeats და Spiderdigitalll, ხოლო მიქსინგსა და მასტერინგზე – Mvykl-მა. ალბომში შესულია ერთადერთი კოლაბორაციული ტრეკი, სახელწოდებით Esketit, რომელიც რეპერ ლუკა ზარქუასთან, იგივე KOA-სთან ერთად ჩაიწერა.
Gigilow ამჟამად ალბომის ცოცხალი შესრულებისთვის ემზადება, ახლო მომავალში კი რამდენიმე ახალი სინგლის გამოცემას გეგმავს.
მოუსმინეთ ალბომს – Rustavelli:
