Billboard
18 ნოემბერი, 2025
კომპოზიცია პროექტ „რკენას” ფარგლებში შეიქმნა და მასზე ნიკა კოჩაროვმა იმუშავა.
ქართულ სპორტულ სივრცეში ახალი პროექტი გამოჩნდა – „რკენა” – შერეული საბრძოლო ხელოვნების ორგანიზაცია, რომელმაც მალევე დაიმსახურა საზოგადოების ინტერესი. განსაკუთრებული ყურადღება მიიქცია მისმა მუსიკალურმა გაფორმებამ – საუნდტრეკმა, რომელიც რევაზ ლაღიძის ცნობილი „საჭიდაოს” ინტერპრეტაციას წარმოადგენს. ახალი ტექსტი, თანამედროვე მუსიკალური ჟღერადობა და განსხვავებული ვოკალი – ეს ის კომპონენტებია, რომლებმაც ყველასათვის საყვარელ ნაწარმოებს ახალი სიცოცხლე შესძინა. კომპოზიციის თანამედორვე მუსიკალური გადაწყვეტა ნიკა კოჩაროვს ეკუთვნის.
ნიკა კოჩაროვი:
„ძალიან საინტერესო პროცესი იყო. ზოგადად, ძალიან რთულია, როდესაც უკვე კარგად ნაცნობ მელოდიას ეხები, რომელიც ისე უნდა გადააკეთო, რომ ხალხი არ გაღიზიანდეს. ამიტომ ვეცადე, რაც შეიძლება მინიმალური ცვლილებები შემეტანა მასში, თუმცა თანამედროვე საუნდებით.
მუშაობისას ჩემთვის ყველაზე მთავარი მომენტია, როცა ამა თუ იმ გადაწყვეტას მივაგნებ. ამ შემთხვევაში ძალიან მალე მივხვდი, რა უნდა გამეკეთებინა. თავიდან კომპოზიცია ძალიან ნელა იწყება, ხოლო შემდეგ უკვე ტემპი ჩქარდება და, შეიძლება ითქვას, უფრო საცეკვაო ხდება. აი, როცა უკვე ტემპი შემოდის, მაგისი არაერთი ვარიანტი ვცადე და როცა იმას მივაგენი, რაც საბოლოო ვერსიაშია, ეგ იყო ერთ-ერთი აღმოჩენის მომენტი ჩემთვის. ასევე მთავარი მიგნება იყო ვოკალი. მთელი სიმღერა რეალურად სულ ერთი ნოტია, რომელიც არ იცვლება. თვითონ მელოდია იმდენად ნაცნობია, რომ რიტმულადაც რომ მღერი, თუნდაც სულ ერთი ნოტით, მაინც ყველა ხვდება, რა არის. ინსტრუმენტი, რა თქმა უნდა, უკრავს მელოდიას, მაგრამ ვოკალი სულ ერთი და იგივეა – ძალიან დაბალი რეგისტრის ბოხი ხმა, რომელიც ერთ ნოტში მღერის. ვფიქრობ, ეს გადაწყვეტა ძალიან მოუხდა თავად იმ კონტექსტს, რისთვისაც კომპოზიცია გაკეთდა. საბოლოოდ, ძალიან მომწონს, რაც გამოვიდა და მიხარია, რომ გამოხმაურებაც ძალიან კარგი აქვს.”
განახლებული „საჭიდაო” უკვე ხელმისაწვდომია მუსიკალურ პლატფორმებზე. მისი მოსმენა შეგიძლიათ იუთუბსა და სპოტიფაიზე.
