2026 წელს Spotify-ს ყოველწლიური Best New Artist-ის წვეულება გრემის ფარგლებში ბრუნდება. ლოს-ანჯელესში მიმდინარე ხანძრების გამო, ღონისძიება 2025 წელს გაუქმდა, ისევე როგორც Spotify-ს ყველა სხვა აქტივობა. კომპანიამ ღონისძიებებისთვის გათვალისწინებული თანხა ლოს-ანჯელესის ხანძრებით დაზარალებულთა დასახმარებლად გაიღო.
წელს ღონისძიება დიდი მასშტაბით ბრუნდება: 21 იანვარს Spotify-მ განაცხადა, რომ Best New Artist-ის კატეგორიის რვავე ნომინანტი წვეულებაზე მუსიკალური ნომრებით წარდგება. წვეულება 29 იანვარს გაიმართება.
„ამ ღონისძიებას უამრავი ფორმატი ჰქონია,“ – თქვა Billboard-ისთვის მიცემულ კომენტარში Spotify-ს მუსიკალური პარტნიორობებისა და აუდიტორიის გლობალურმა ხელმძღვანელმა ჯო ჰედლიმ. „თუმცა მისი იდეა ყოველთვის უცვლელი იყო – ეს არის არტისტების მხარდაჭერა მათი კარიერის გადამწყვეტ მომენტში.“
მისივე თქმით, „წელს მუსიკის ყველაზე მნიშვნელოვან კვირაში სრულფასოვანი, ცოცხალი ღონისძიებით დაბრუნება სიმტკიცის გამოხატულებაა. ვისწავლეთ, როგორ ვიყოთ მოქნილები, როგორ შევიცვალოთ მიმართულება და მაინც შევინარჩუნოთ მნიშვნელობა ნებისმიერ გარემოებაში. ერთ სივრცეში დაბრუნება და ახალი თაობის არტისტების ასე მასშტაბურად მხარდაჭერა განსაკუთრებულად ემოციურია.“
2026 წლის Best New Artist-ის ნომინანტთა შორის არიან: ედისონ რეი, ალექს უორენი, KATSEYE, ლეონ თომასი, ლოლა იანგი, ოლივია დინი, sombr, The Marías. რვავე არტისტი ასევე გამოვა გრემის დაჯილდოების პირდაპირ ეთერში, რომელიც 1-ელ თებერვალს გაიმართება.
Spotify-მ Best New Artist-ის გრემის წვეულებას პირველად 2017 წელს უმასპინძლა. მაშინ სადებიუტო ღონისძიებაზე მხოლოდ ორი ნომინანტი გამოვიდა – The Chainsmokers და მარენ
„Best New Artist-ის ნომინანტები ყველაზე დაკავებულ არტისტებს შორის არიან. მოლაპარაკებები ჩვეულზე ბევრად ადრე დავიწყეთ და თითოეული მათგანის საჭიროებებს ყურადღებით მოვუსმინეთ,” – აღნიშნა Spotify-ს წარმომადგენელმა.
მისივე თქმით, წვეულებას უკვე დამკვიდრებული რეპუტაცია აქვს და არტისტებიც სიხარულით ელიან. ჰედლის თქმით, კომპანიაში მუშაობის პერიოდში განსაკუთრებულად დასამახსოვრებელი იყო 2024 წლის წვეულება, რომელზეც Ice Spice გამოვიდა.
