Super Bowl LX-ზე გამოსვლის შემდეგ, მომავალ თვეში, Bad Bunny Spotify-ს სერიის, Billions Club Live-ის ჰედლაინერი იქნება, რომელიც აზიაში პირველად ჩატარდება. 7 მარტს არტისტი კონცერტს იაპონიაში, ტოკიოში გამართავს. ღონისძიება ექსკლუზიურად მისი ყველაზე აქტიური მსმენელებისთვისაა განკუთვნილი.
„ტოკიოში გულშემატკივრებს შეუძლიათ ელოდონ სიმღერების იმ ჩამონათვალს, რომლებმაც მილიარდობით მოსმენა დააგროვეს და მისი კარიერა განსაზღვრეს, “ – ნათქვამია Spotify-ს განცხადებაში.
ეს იქნება პუერტო-რიკოელი სუპერვარსკვლავის პირველი გამოსვლა აზიაში და Spotify-ს პირველი Billions Club Live ღონისძიება ამ რეგიონში. სტრიმინგ პლატფორმის განმარტებით, ეს არ არის ტურნეს ნაწილი – ეს ერთჯერადი, სპეციალური ღონისძიებაა.
Bad Bunny-ს ეს გამოსვლა Spotify-ს Billions Club-ში მის მიღწევებს ეძღვნება: Bad Bunny-ს 28 სიმღერამ 1 მილიარდიანი ზღვარი გადალახა. 2025 წელს მან მეოთხედ დაიკავა მსოფლიოს ნომერ პირველი არტისტის პოზიცია, რაც უპრეცედენტო შემთხვევაა.
Bad Bunny-სთვის რეკორდების მოხსნა უკვე ჩვევად იქცა. 9 თებერვალს Super Bowl-ზე მის გამოსვლას 128.2 მილიონი მაყურებელი ადევნებდა თვალს, რამაც ის ისტორიაში მეოთხე ყველაზე რეიტინგულ შოუდ აქცია.
ამას Billboard-ის ჩარტების დაპყრობაც მოჰყვა. Hot Latin Songs-ში ვარსკვლავი ერთდროულად 29 სიმღერითაა წარმოდგენილი, რაც ახალი რეკორდია. სიმღერა DtMF კი უკვე 47-ე კვირაა, ლიდერობს. Billboard Hot 100-ში არტისტი საერთო რეიტინგში პირველ ადგილს იკავებს, Global 200-ში კი საუკეთესო ხუთეულზე სრულ მონოპოლიას ფლობს.
გარდა ამისა, 1-ელ თებერვალს მისი ალბომი DeBí TiRAR MáS FOToS ისტორიაში შევიდა, როგორც პირველი ესპანურენოვანი ალბომი, რომელმაც გრემის დაჯილდოებაზე „წლის ალბომის“ ნომინაციაში გაიმარჯვა. ავსტრალიის ოფიციალურ ჩარტებში (ARIA) აღნიშნულმა ალბომმა მე-20-დან მე-4 ადგილზე გადაინაცვლა.
Bad Bunny-მდე Billions Club Live-ის ფარგლებში კონცერტები გამართეს ედ შირანმა (დუბლინი), მაილი საირუსმა (პარიზი) და The Weeknd-მა (ლოს-ანჯელესი).
