მიუხედავად იმისა, რომ Pussycat Dolls-ის ერთ-ერთმა წევრმა კარმიტ ბაჩარმა არც კი იცოდა, თუ რატომ არ მიიწვიეს ჯგუფის მომავალ ტურნეზე, ბენდის პირველი შემადგენლობის წევრი ჯესიკა სატა დარწმუნებულია, თუ რატომ არ მისცეს ჯგუფში დაბრუნების შესაძლებლობა.
პოდკასტ The Maverick Approach-ის ბოლო ეპიზოდში ჯესიკა სატამ წამყვან მავერიკ ბეილისთან სწორედ ამ თემაზე ისაუბრა.
„მე მხარი დავუჭირე რობერტ ფრენსის კენედი უმცროსს, რაც, ბუნებრივია, MAGA-სთან (Make America Great Again) ასოცირდება, სწორედ ამიტომ საფრთხედ აღმიქვეს,“ – აცხადებს ჯესიკა სატა. მისივე შეფასებით, ჯგუფის გაერთიანებული ტურნე უფრო „ფინანსურ ინტერესებს“ ემსახურება. სატა ასევე აღნიშნავს, რომ ადრე საკუთარ თავს პოლიტიკურად აქტიურ ადამიანად არ მიიჩნევდა, თუმცა ეს დამოკიდებულება დროთა განმავლობაში შეიცვალა და დღეს „ეს უკვე მისი ცხოვრებისეული გზაა.”
2025 წელს Daily Mail-თან ინტერვიუში ჯესიკა სატამ ჯანმრთელობის სერიოზულ პრობლემებზე ისაუბრა, რომელიც COVID-19-ის ვაქცინას დაუკავშირა. სწორედ ამ გამოცდილებამ დააახლოვა იგი რობერტ ფრენსის კენედი უმცროსთან, რომლის საარჩევნო კამპანიაშიც 2024 წლის აშშ-ის საპრეზიდენტო არჩევნების პერიოდში მონაწილეობაც მიიღო.
პოდკასტში ჯესიკა სატა განმარტავს, რომ მიუხედავად იმისა, რომ პრეზიდენტ დონალდ ტრამპის ყველა გადაწყვეტილებას არ ეთანხმება, ჯანდაცვის საკითხებში მისი მხარდაჭერა რობერტ ფრენსის კენედი უმცროსისა და მისი პოლიტიკის მიმართ იმდენად ძლიერია, რომ მწვავე კრიტიკის მიუხედავად, MAGA-ს იარლიყს არ გაურბის და მას ამაყად ატარებს.
„საზოგადოება მიმითითებს: „შენ MAGA ხარ. მათ მინდა ვუთხრა, დიახ, მე MAGA ვარ. ამას ვადასტურებ კიდეც, რადგან დავიღალე სხვისი მითითებებით, თუ ვინ უნდა ვიყო.” – ამბობს ჯესიკა სატა.
ეს არ არის პირველი შემთხვევა, როდესაც ჯესიკა სატა ჯგუფის გაერთიანებას საჯაროდ გამოეხმაურა. ბენდის ვრცელი განცხადებიდან რამდენიმე დღის შემდეგ მან ინსტაგრამზე ვრცელი პოსტი გამოაქვეყნა, სადაც აღნიშნა, რომ ხელახალი გაერთიანების შესახებ ინფორმაცია საჯაროდ გამოქვეყნების წინ შეიტყო, თუმცა ინტერნეტში გამოხმაურებისთვის საკმარისი დრო არ ჰქონდა.
პოსტის ბოლოს სატა წერს: „და თუ გულწრფელები ვიქნებით, არ უნდა დაგაბრკოლოს იმან, რაც უკვე უკან არის. წარმატებებს გისურვებთ, გოგოებო.“
აღსანიშნავია, რომ ჯესიკა სატა არ არის ერთადერთი წევრი, რომელიც ბენდის ხელახალი გაერთიანების ტურნეს მიღმა დარჩა. მას შემდეგ, რაც The Pussycat Dolls-მა სამი წევრისგან შემდგარი ტურნე დააანონსა და ახალი სინგლი Club Song გამოაქვეყნა, კარმიტ ბაჩარმაც განაცხადა, რომ მან ჯგუფის აღდგენის შესახებ არაფერი იცოდა:
„არავინ დამკავშირებია ჯგუფის გადაწყვეტილებასთან დაკავშირებით და ამ გეგმების შესახებ მეც ისევე გავიგე, როგორც საზოგადოებამ,“ – დაწერა კარმიტ ბაჩარმა. საბოლოოდ, მან გადაწყვიტა, რომ ეს ყველაფერი წარსულში დატოვოს და საკუთარ კეთილდღეობასა და მომავალ პროექტებზე ფოკუსირდეს.
Pussycat Dolls-ის პირვანდელი, ექვსკაციანი შემადგენლობა შემდეგ წევრებს მოიცავდა: ნიკოლ შერზინგერს, კიმბერლი უაიატს, ეშლი რობერტსს, მელოდი თორნტონს, კარმიტ ბაჩარსა და ჯესიკა სატას. ხელახალი გაერთიანებისას კი ჯგუფში მხოლოდ ნიკოლ შერზინგერი, კიმბერლი უაიატი და ეშლი რობერტსი ბრუნდებიან. მიუხედავად იმისა, რომ ბაჩარმა და სატამ უკვე დააფიქსირეს საკუთარი პოზიცია, მელოდი თორნტონს, რომელიც ჯგუფის წევრი 2010 წლის შემდეგ აღარ ყოფილა, საჯარო განცხადება აქამდე არ გაუკეთებია.
