კილიან მერფის ადრეული მუსიკალური კარიერა კიდევ ერთხელ მოხვდა ინტერნეტის ფოკუსში. მსახიობმა ინტერნეტ პლატფორმა Track Star-ის ვიდეოში მიიღო მონაწილეობა, სადაც ის სიმღერის გამოცნობას შეეცადა. სწორედ წამყვანთან დიალოგისას გაიხსენა მან თავისი კავშირი მუსიკასთან.
სანამ კილიან მერფი ცნობილი მსახიობი გახდებოდა, ის ეისიდ-ჯაზ (acid jazz) ჯგუფში რიტმ-გიტარაზე უკრავდა. ბენდს The Sons of Mr. Green Genes ერქვა. სახელწოდება ბენდის წევრებმა შეარჩიიეს ფრენკ ზაპას კომპოზიციის ინსპირაციით, ალბომიდან – Hot Rats. მერფი და მისი მეგობრები ფანკით, სოულითა და ზაპას შემოქმედებით იყვნენ გატაცებული და საკმაოდ შთამბეჭდავ ცოცხალ შოუებსაც მართავდნენ.
2024 წელს ინტერნეტში ვირუსულად გავრცელდა ვიდეო, სადაც 19 წლის კილიან მერფი ცოცხალი მუსიკალური შოუების და ეისიდ-ჯაზის ჟანრისადმი სიყვარულზე საუბრობს. The Sons of Mr. Green Genes-ის წევრებთან ერთად მერფი ვიდეოში ამ ჟანრის ნიუანსებს მიმოიხილავს.
ჯერ კიდევ 2020 წელს, BBC Radio 6 Music-თან ინტერვიუში, მერფიმ თავის ადრეულ მუსიკალურ გამოცდილებაზე ისაუბრა. მან აღნიშნა, რომ ჯგუფში თინეიჯერობისას უკრავდა, თუმცა 18-19 წლის ასაკში, როდესაც კონტრაქტი შესთავაზეს, შეთანხმება საბოლოოდ ჩაიშალა, რამაც მისი მუსიკალური ოცნებაც დაასრულა.
როგორც კილიან მერფი მედიასთან აღნიშნავს, ის დღემდე ინარჩუნებს ახლო ურთიერთობას ბენდის წევრებთან. მისი თქმით, შესაძლოა, ამ მეგობრობას საფრთხე დამუქრებოდა, ახალგაზრდობაში მუსიკალური ინდუსტრიის „მარწუხებში“ რომ მოხვედრილიყვნენ.
