ახალგაზრდა ქართველი მუსიკოსი – გიტარისტი, დრამერი, ბასისტი და პროდიუსერი ალექსანდრე ნაკაშიძე (AKA ნაკაშა) Didube Records-ის წევრია. ის საკუთარ შემოქმედებით პროცესს უფრო ცეკვასა და თამაშს ადარებს, ვიდრე მკაცრად განსაზღვრულ, დისციპლინირებულ რუტინას.
ლევან ოქროპირიძე სასცენო სახელით Denivar Levy კი პროდიუსერი, ხმის ინჟინერი და დიჯეია, რომელიც ამჟამად SAE Frankfurt-ში Audio Production/Sound Engineering-ის ბაკალავრიატზე სწავლობს. მისი მუსიკალური კატალოგი ათ ბით-თეიფს, ოთხ ალბომსა და სამ EP-ის მოიცავს.
სიმღერა ALAGALA G მუსიკალურ პლატფორმებზე პირველ აპრილს დარელიზდა. ლევან ოქროპირიძის თქმით, ტრეკი მუსიკალური სესიის შემდეგ ჩაიწერა:
„მე, ნაკაშას, მემე ჟორდანიას და ნინი ნუცუბიძეს გვქონდა სესია ნაკაშასთან, სახლში. საღამოს ნინი წავიდა, მემეს მატრასზე ჩაეძინა, ხოლო ალექსანდრე ოთახიდან გასული იყო. მოკლედ, მარტო დავრჩი და ზუსტად ამ დროს შევქმენი ALAGALA G-ის ინსტრუმენტალის ჩონჩხი. შემდეგ ნაკაშა შემოვიდა ოთახში და ბასი გადააწერა, რის შემდეგაც ტექსტი გავაფრისტაილე და ტრეკის დემო მზად გვქონდა.”
ტექსტის პირველ სტრიქონებშიც ზუსტად ეს სიტუაციაა აღწერილი: “ნაკაშაა ბასზე, მემე წევს მატრასზე… მრგვალი ბაღის ტანზე ვიმყოფებით ჩვენ…”
როგორც არტისტი ამბობს, ტრეკის შექმნის პროცესი ბუნებრივად განვითარდა: „ჩვენც თითქოს ამ დინებას მივყვებოდით: ჯერ ვოკალი დაიჭრა, დაემატა პედი, ნაკაშამ ბასი დაწერა, დრამს პერკუსია და ტექსტი დაემატა და ყველაფერი მზად იყო.” – ლევან ოქროპირიძე.
ახალი ტრეკი ALAGALA G Denivar Levy-ის (ლევან ოქროპირიძის) EP-ში სახელწოდებით FORUMZE არის შესული, რომელიც 6 აპრილს გამოქვეყნდება. „ყოველ მოსმენაზე მგონია, რომ რაღაცის ფინალს ვუსმენ, თითქოს ყველაფერი დასრულდა, ეს ტრეკი კი ამ ისტორიის Afterword-ია. შესაბამისად, Ep-ის შემაჯამებელი ტრეკი და წამყვანი სინგლიც სწორედ ეს არის.“ – ლევან ოქროპირიძე.
მოისმინეთ ლევან ოქროპირიძისა და ალექსანდრე ნაკაშიძის ახალი სინგლი ALAGALA G:
