დეივ გროლისა და მისი გუნდის ალბომი Your Favorite Toy ნამდვილი როკ ნამუშევარია, რომელიც უკვე გამოშვებულ სიმღერებს: Caught In The Echo-ს და All of the People-ს მოიცავს – ეს უკანასკნელი სიმღერა ბენდმა ირლანდიაში, ისტორიულ St James Church-ში ცოტა ხნის წინ ცოცხლად შეასრულა.
Foo Fighters ალბომის პოპულარიზაციას აქტიურად 25 აპრილს, ბრიტანულ Saturday Night Live-ში გააგრძელებს. ამავდროულად, გამოვიდა სიმღერა Window-ს ოფიციალური მუსიკალური ვიდეო ჯეიკ ერლანდის რეჟისორობით და სულ მალე დაიწყება მასშტაბური ტურნე Take Cover Tour. მანამდე Foo Fighters-მა ალბომში შესული სიმღერები საკუთარ ვებგვერდზე ინტერაქტიული, რეტრო სტილის გვერდის საშუალებით დააანონსა, სადაც სიმღერების ფრაგმენტები ჯგუფის სტუდიურ და სცენურ ფოტოებში იყო ჩაშენებული.
„ამ ახალ კრებულზე მუშაობა ყველაზე სასიამოვნო პროცესი იყო, რაც კი წლების განმავლობაში ჩაწერისას მიგვიღია. ჯგუფი მას ყოველგვარი წესებისა და ზეწოლის გარეშე“ მიუდგა – უბრალოდ, ინსტრუმენტების ჩართვისა და შედეგის ნახვის სურვილით, საბოლოოდ კი 10 ტრეკისგან შემდგარი, 36-წუთიანი ნამუშევარი მივიღეთ, რომელიც ხმამაღალია, მელოდიური, უცნაურიც… თუმცა ის ჩვენია და ცოცხალია.” – ამბობს დეივ გროლი Classic Rock-თან საუბარში.
პრესრელიზის თანახმად, LP სახლის პირობებში ჩაიწერა, მისი თანაპროდიუსერები იყვნენ თავად Foo Fighters და Oliver Roman (The Cribs, Wolfmother). აღსანიშნავია, რომ ეს ახალი დრამერის, ილან რუბინის სადებიუტო ჩანაწერია, სწორედ მან ჩაანაცვლა ჯოშ ფრიზი, ვეტერანი მუსიკოსი, რომელიც გარდაცვლილი ტეილორ ჰოკინსის ადგილს ორი წლის განმავლობაში იკავებდა, სანამ ის გასულ მაისს ჯგუფს დატოვებდა.
ეს ალბომი 2023 წელს გამოცემული But Here We Are-ის ერთგვარი გაგრძელებაა. ალბომმა Billboard 200-ზე მე-8 ადგილი დაიკავა და Foo Fighters-ისთვის ტოპ-10-ში მოხვედრილი მეათე ჩანაწერი გახდა. ამ მაჩვენებელში შედის მათი ორი N1 ალბომიც: Wasting Light (2011) და Concrete And Gold (2017).
Foo Fighters-ის მომავალი მსოფლიო ტურნე აშშ-ში რამდენიმე კონცერტით იწყება და სტარტს მომავალ სამშაბათს, 28 აპრილს, Total Mortgage Arena-ში აიღებს. შემდეგ კი ევროპული ტურნე გაიმართება, რომელიც 10 ივნისს ოსლოში Unity Arena-ში დაიწყება. ხოლო აგვისტოსა და სექტემბერში ჯგუფი ჩრდილოეთ ამერიკაში კიდევ ერთ მასშტაბურ ტურნეს გამართავს, ნოემბერში კი ავსტრალიასა და ახალ ზელანდიას ეწვევიან, სადაც დამატებითი კონცერტები 2027 წლის იანვარშიც არის დაგეგმილი.
ნახეთ Window-ს მუსიკალური ვიდეო და მოუსმინეთ ალბომს Your Favorite Toy სრულად:
