18 ივლისს ინგლისში Spice Girls-ის წევრის, მელანი ჩისჰოლმის (Mel C) ქორწილი შედგა – მან ჯვარი ქრის დინგვოლზე დაიწერა. სიდნეის რადიოსადგურ KIIS 1065-თან საუბრისას მელანიმ ქორწილის შესახებ შთაბეჭდილებები გააზიარა: „ეს ყველაფერი საოცარი იყო. ემოციებით სავსე ვარ. ულამაზესი უქმეები გავატარეთ ოჯახის წევრებთან და მეგობრებთან ერთად“.
მომღერალმა პასუხი გასცა კითხვასაც, რომელიც ბევრს აინტერესებდა: რატომ არ იმყოფებოდა ქორწილში ვიქტორია ბექჰემი, მაშინ, როდესაც ცერემონიას Spice Girls-ის ყველა დანარჩენი წევრი ესწრებოდა.
„ვიქტორია ძალიან წუხდა, რომ ჩამოსვლა ვერ შეძლო. ის დევიდთან ერთად ნიუ-იორკში იმყოფებოდა, სადაც მსოფლიო ჩემპიონატის ფინალური ეტაპი მიმდინარეობდა. ვიქტორია ფეხბურთის დიდი ფანი არ არის, თუმცა მისი ოჯახი იქ იყო, რადგან დევიდ ბექჰემს, როგორც FIFA-ს ელჩს, გარკვეული ვალდებულებები აქვს“.
აღსანიშნავია, რომ მელანის საქორწინო კაბა სწორედ ვიქტორია ბექჰემის დიზაინით შეიქმნა. გარდა ამისა, ბექჰემმა ჩისჰოლმს ოფიციალური სამოქალაქო ცერემონიისთვის საკუთარი კაბაც ათხოვა.
„მელანისთან ერთად ვვახშმობდი და ვკითხე, რას გეგმავდა,” – უთხრა ბექჰემმა British Vogue-ს გასულ თვეში. „მან მითხრა, რომ ორ დღეში ავსტრალიაში მიფრინავდა და თხოვდებოდა. როდესაც ვკითხე, რა ეცმებოდა, აღნიშნა, რომ ჩემი ერთ-ერთი კაბა შეუკვეთა, თუმცა ტანზე ზუსტად არ მოერგო, გამგზავრებამდე კი გადაკეთებას ვერ მოასწრებდა. საბედნიეროდ, ზუსტად ის კაბა ჩემს გარდერობში აღმომაჩნდა და ვათხოვე“.
ჩისჰოლმმა KIIS-ის რადიოსთან საუბრისას აღნიშნა, რომ ვიქტორია მას მთელი დღის განმავლობაში ეკონტაქტებოდა: „მან ეს მშვენიერი კაბა შექმნა და იმ დღეს შეტყობინებებს მწერდა. მოგვიანებით იბიცაზეც შევხვდით, ვისაუბრეთ და სიახლეები გავუზიარეთ ერთმანეთს.”
რადიოგადაცემაში საუბარი ასევე შეეხო ქორწილში Spice Girls-ის კიდევ ერთი წევრის, ჯერი ჰოლიუელის იმიჯს, რომელიც ცერემონიაზე თეთრი სამოსით გამოცხადდა. სოციალური ქსელის მომხმარებლები წერდნენ, რომ ამით ჯერიმ ყურადღება საკუთარ თავზე გადაიტანა.
„ეს ჯერის საყვარელი ფერია, თეთრი ყოველდღე აცვია,” – თქვა მელანი ჩისჰოლმმა.
აღსანიშნავია, რომ ჩისჰოლმმა თავისი მეცხრე სტუდიური ალბომი, სახელწოდებით Sweat, მაისში გამოუშვა.
