თუფაქ შაკურის მკვლელობის სასამართლო პროცესზე დოკუმენტურ ფილმს იღებენ. The Hollywood Reporter-ის ცნობით, კომპანიებმა Propagate Content-მა და Passion Pictures-მა დაამტკიცეს პროექტი, რომელიც რეპის ლეგენდარული ფიგურის მკვლელობის ორგანიზებაში ბრალდებულის, დუეინ „Keffe D“ დევისის გასამართლების პროცესს ასახავს.
ფილმის რეჟისორი მარიან მოჰამედია. სურათი მაყურებელს ლას-ვეგასის სასამართლო დარბაზის კულისებში შეიყვანს და შოუბიზნესის ისტორიაში ერთ-ერთ ყველაზე გახმაურებულ, თითქმის ოცდაათწლიანი პაუზის შემდეგ გახსნილ საქმეს უკეთ გააცნობს.
„მინდა, ამ ფილმმა მხარი დაუჭიროს ოჯახს, რომელიც თითქმის სამი ათწლეულია გლოვობს და რომელმაც, როგორც იქნა, შეძლო იმ პროცესზე გავლენის მოხდენა, თუ როგორ უნდა აღიქვამდეს საზოგადოება თუფაქის მკვლელობას,” – აცხადებს მოჰამედი. რეჟისორის თქმით, სურს, დოკუმენტურმა ნამუშევარმა თითოეულ ადამიანში ემოციები აღძრას და გაიაზროს არა მხოლოდ ის, თუ როგორ დაიღუპა რეპერი, არამედ ისიც, თუ ვინ იყო ის სინამდვილეში.
დოკუმენტური ფილმი მოიცავს შაკურის უახლოესი გარემოცვისა და ოჯახის წევრების ინტერვიუებს, მათ შორის მისი ძმის, მოპრის შაკურის ინტერვიუს. ფილმში ასევე გამოყენებული იქნება 2Pac-ის გარდაცვალებასთან დაკავშირებული მანამდე გამოუქვეყნებელი საარქივო კადრები. ჯერჯერობით უსათაურო პროექტი 2027 წელს, Sky Documentaries-სა და NOW-ს ეთერში გავა.
„ცოტა საიდუმლოებას მიუპყრია საზოგადოების ყურადღება ისე, როგორც თუფაქ შაკურის მკვლელობას. ეს გამორჩეული ფილმი მაყურებელს პროცესების ეპიცენტრში შეიყვანს იმ ადამიანებთან ერთად, რომლებიც ამ ტკივილით, პასუხგაუცემელი კითხვებითა და სიმართლის ძიებით წლებია, ცხოვრობენ,“ – აღნიშნავს Propagate Content-ის თანადამფუძნებელი ჰოვარდ ოუენსი.
დევისი 2023 წელს დააკავეს, მას შემდეგ, რაც პროკურორებმა Crips-ის დაჯგუფების ყოფილ ლიდერს ვრცელი ბრალდება წაუყენეს. გამოძიების ვერსიით, მან შაკურზე თავდასხმა შურისძიების მიზნით დაგეგმა. ეს მას შემდეგ მოხდა, რაც 2Pac და მისი გარემოცვა იმავე საღამოს, მაიკ ტაისონის ორთაბრძოლის დასრულებისთანავე, დევისის ძმისშვილს, ორლანდო ანდერსონს ფიზიკურად გაუსწორდნენ. ლეგენდარული რეპერი ლას-ვეგასში, მანქანიდან ცეცხლსასროლი იარაღის გამოყენებით მძიმედ დაიჭრა და 6 დღის შემდეგ, 25 წლის ასაკში გარდაიცვალა.
63 წლის დევისი გასულ წლებშიც არ მალავდა თავის კავშირს ამ მკვლელობასთან, რაზეც ვრცლად ისაუბრა 2019 წელს გამოცემულ ავტობიოგრაფიულ წიგნსა და ინტერვიუებში.
აგვისტოში, ორკვირიანი სასამართლო განხილვებისას, პროკურორებმა 24 მოწმე დაკითხეს, რის შემდეგაც, 31 აგვისტოს, ნაფიც მსაჯულთა სასამართლომ დევისი დამნაშავედ ცნო დამამძიმებელ გარემოებებში ჩადენილ მკვლელობაში. საბოლოო განაჩენი 13 ოქტომბერს გამოცხადდება – დევისს სამუდამო პატიმრობა ემუქრება.
