კანადელმა სუპერვარსკვლავმა, დრეიქმა დაანონსების გარეშე რიგით მეშვიდე სტუდიური ალბომი Honestly, Nevermind გამოუშვა. 35 წლის მუსიკოსმა თაყვანისმცემლებს ახალი ჩანაწერის შესახებ მხოლოდ გუშინ აცნობა.
ბოლო ალბომი Certified Lover Boy შემსრულებელმა 2021 წლის 3 სექტემბერს გამოაქვეყნა. ნამუშევარი Billboard 200-ისა და არენბი/ჰიპ ჰოპ ალბომების ჩარტების სათავეში მოხვდა. ცხელი ასეულის პირველი ადგილი კი იანგ თაგისა და Future-ს მონაწილეობით ჩაწერილ ჰიტს Way 2 Sexy ერგო.
ობრი დრეიქ გრეემმა მუსიკალური მოღვაწეობა 2001 წელს დაიწყო. მისი კარიერული აღმასვლა ლეიბლს Young Money Entertainment უკავშირდება. 2010 წელს არტისტმა სადებიუტო, კომერციულად წარმატებული ჩანაწერი Thank Me Later გამოუშვა, რომელიც Billboard 200-ის სათავეში მოხვდა. აღსანიშნავია, რომ მის მიერ გამოშვებული ყველა ალბომი ხსენებულ ჩარტში პირველ პოზიციაზე გავიდა. ოთხი გრემის მფლობელ რეპერს მსოფლიოში 170 მილიონზე მეტი ჩანაწერი აქვს გაყიდული. დრეიქი ლეიბლ OVO Sound-ის დამფუძნებელია.
