23 ნოემბერს პროექტ „უსმინე USMINE“-ს ფარგლებში, Leno Records-ში, მორიგი Live სესია გაიმართა. საღამოს ჯგუფი LOUDspeakers, მუსიკოსი Sophie Villy და არტისტი მარიამ იაქაშვილი (სასცენო სახელით Jemmy truth) მსმენელის წინაშე წარდგნენ.
„უსმინე USMINE“ მუსიკალური პროექტია, რომელიც აუდიტორიას მხოლოდ ცოცხალ შესრულებას სთავაზობს. პროექტი 2019 წელს დაარსდა, მისი მიზანი კი, საქართველოში მოღვაწე მუსიკოსების ერთ სივრცეში თავმოყრა და ცოცხალი მუსიკის პოპულარიზაციაა.
“ამ კონკრეტული „უსმინე USMINE“-ს Live-ის შემდეგ, პროექტის ფარგლებში დაიდება ვიდეო, სადაც მაყურებელი ჩემი ყველაზე ცნობილი სიმღერის შექმნის ისტორიას იხილავს. თუ როგორ გახდა ცნობილი, ჩემი ერთ-ერთი სიმღერა Position, რომელიც უკვე ათი წლისაა. ეს არის პოლიტიკურ მოვლენებზე დაწერილი სიმღერა, რომელიც 2012 წელს შეიქმნა. დღეს კი, იგივე რეალობა გვაქვს. არაფერი შეცვლილა და უფრო და უფრო აქტუალური ხდება. რაც შეეხება თვითონ ამ პროექტს და ზოგადად Live ღონისძიებებს, ვთვლი, რომ ძალიან საჭიროა ჩვენი მოცემულობიდან გამომდინარე, რომ ახალგაზრდა ბენდებმა იაქტიურონ. ძალიან ბევრი ნიჭიერი მუსიკოსია, რომელსაც არანაირი მხარდაჭერა არ აქვთ. დღეს ერთ-ერთი ახალგაზრდა მუსიკოსის, Jemmy truth-ის წარდგენაა, რომელსაც ჩვენც და Loudspeakers-ი ხელს ვუწყობთ. მე მივესალმები ყოველთვის ესეთ ფაქტებს, იმიტომ რომ თუ არ იქნება მუსიკოსებს შორის ერთობა, კოლეგიალურობა და ერთმანეთის გვერდში დგომა, იმ მოცემულობაში ვიქნებით დეკადების მერეც, როგორშიც ახლა ვართ.“ – მუსიკოსი Sophie Villy.
თანამედროვე და ცნობილი მუსიკოსების მოწვევის გარდა, პროექტი ახალგაზრდა დამწყები მუსიკოსების მხარდაჭერასაც ითვალისწინებს. „უსმინე USMINE“-ს ფარგლებში სწორედ ერთ-ერთი ნიჭიერი მუსიკოსის Jemmy truth-ს დებიუტი შედგა.
„ჩემთვის მუსიკა ყველაზე დიდი ჰიპნოზის ძალა და იარაღია, რომელიც კი არ გკლავს, გაცოცხლებს, სიცოცხლის უნარიანობას გძენს. „უსმინე USMINE“-ზე ჩემი გამოსვლა ძალიან სპონტანურად დაიგეგმა. ამჟამად ბენდთან ერთად გამოვდივარ, მათ ძალიან შემიწყვეს ხელი და ჩემგანაც ბენდს სრული თავისუფლება აქვს. რეალურად რომ ვთქვა, ძალიან დიდი ხანია ვუკრავ და ვმღერი, მაგრამ არავინ ჩემით ესე არ დაინტერესებულა. ამიტომ მნიშვნელოვანი და აუცილებელია არტისტს ჰყავდეს მენეჯერი, რომელიც ამ ყველაფერს მიხედავს და მოაგვარებს. ბენდის წევრებთან ერთად ამ საღამოს მე ვაზიარებ პატივისცემას, სიყვარულს და ერთიანობას.“ – მომღერალი Jemmy truth.
„უსმინე USMINE“-ს LIVE სესიების დროს მუსიკოსების ცოცხალი შესრულების ვიდეოები, დოკუმენტური ფილმები და მოკლე ვიდეო ამბები მზადდება.
„როგორ გაიგო ყველამ“ – „უსმინე USMINE“-ს შვილობილი პროექტია, რომელიც მუსიკოსების ცნობილი ჰიტების შექმნის შესახებ მოგვითხრობს.
„უსმინე USMINE“-ს ფარგლებში პირველად ვიღებთ მონაწილეობას, ქართველი არტისტებისთვის და მუსიკოსებისთვის ეს პროექტი პირველ რიგში იმით გამოირჩევა, რომ ორი პროფესიონალურად გადაღებული, კარგი ვიდეო ექნებათ, რაც პორტფოლიოსთვის ზოგადად აუცილებელია. ამ პროექტის ერთ-ერთი მთავარი პლუსიც სწორედ ეს არის.“ – ლევან ლოუდაძე LOUDspeakers-ის ვოკალისტი.
LOUDspeakers-მა საღამოს რამდენიმე სიმღერა შეასრულა. მათ შორის, ახალი სიმღერა Jellyfish, რომლის ვიდეო კლიპიც გიორგი გვარჯალაძის (Gvaji) რეჟისორობით, სწორედ Leno Records-შია გადაღებული.
„უსმინე USMINE-ს პროექტი არის ცოცხალი კონცერტების სერია, რომელიც ერთ ადგილას არ ტარდება, თუმცა დაემთხვა ისე, რომ ბოლო ორი LIVE სესია Leno Record-ში ჩატარდა. თავდაპირველად, პროექტის ფარგლებში მხოლოდ ცოცხალი მუსიკა სრულდებოდა, შემდეგ განვითარების პროცესში ახალი პროექტის იდეა გაჩნდა – „როგორ გაიგო ყველამ”, რომელიც ცნობილი ჰიტის შექმნის ისტორიას გვიყვება. Ასევე იქმნება დოკუმენტური ფილმები. პანდემიის პერიოდში „უსმინე USMINE“-მ ფირფიტა გამოუშვა, სადაც 2019 წლის შვიდი საუკეთესო სიმღერაა შესული. „უსმინე USMINE“ – ეს არის დიდი ბაზა, სადაც მელომანს, ერთ სივრცეში, ქართველი არტისტების, ხარისხიანი მუსიკის მოსმენა შეუძლიათ.“ – გვანცა ჯიშკარიანი – „უსმინე USMINE-ს“ დამფუძნებელი.
მოუსმინეთ „უსმინე USMINE“-ს ოფიციალურ Youtube არხზე
