ჯეფ უანფორი, გრემის მფლობელი ბრიტანელი რეჟისორი, რომელმაც The Beatles Anthology გადაიღო, 73 წლის ასაკში გარდაიცვალა. გარდაცვალების ფაქტი მისმა ქალიშვილმა დაადასტურა.
The Beatles Anthology, რომელიც 90-იანი წლებში გამოვიდა, ავტორიზებული მულტიმედია პროექტი იყო, რომელიც 8-ნაწილიან დოკუმენტურ ფილმს, ალბომების 3 ნაკრებსა და წიგნს მოიცავდა. უანფორმა ჯამში 2 წელი მიუძღვნა ფილმს, რომელიც არქივის ჩანაწერებსა და მაშინ უკვე ჯგუფის დარჩენილი სამი წევრის ახალ ინტერვიუებს აერთიანებდა (პოლ მაკარტნი, რინგო სტარი და ჯორჯ ჰარისონი). უონფორის მთავარი გამოწვევა ფილმში უკვე გარდაცვლილი ჯონ ლენონის კომენტარების ჩასმა იყო.
„ინტერვიუებში ის ძალიან ვოკალური იყო. მომივიდა იდეა, რომ მომესმინა მისი ყველა ინტერვიუ, ამეღო იქიდან შესაბამისი კითხვები და ჯგუფის დანარჩენი წევრებისთვის დამესვა. გამოვიდოდა ისე, თითქოს ოთხივე ერთსა და იმავე კითხვას პასუხობდა. სინამდვილეში ასეც იყო,” – ჰყვება რეჟისორი ინტერვიუში.
The Beatles Anthology-მ ბენდის ახალი პოპულარობის ტალღა ააგორა და უანფორსა და მის თანარეჟისორს ბობ სმეტონს 1997 წელს საუკეთესო მუსიკალური ხანგრძლივი ვიდეოსათვის გრემი მოუტანა.
უანფორს გადაღებული აქვს პოლ მაკარტნის ვიდეოკლიპებიც In the World Tonight და Young Boy. ასევე მომღერლის კონცერტის ვიდეო ლივერპულში.
ჯეფ უანფორი ბრიტანულ შოუ-ბიზნესში 1980-იანი წლებიდანაა ცნობილი, როცა მან The Tube-ის ეპიზოდები გადაიღო და დოკუმენტური ფილმი გააკეთა ფილმ Shanghai Surprise-ის შესახებ, სადაც მადონა და შონ პენი თამაშობენ და რომლის პროდიუსერიც ჯორჯ ჰარისონი იყო. სწორედ ჰარისონთან თანამშრომლობამ მოუტანა უონფორს მთავარი წარმატებაც.
2018 წლის ნიუკასლის ფილმის ფესტივალზე რეჟისორი მოჰყვა, თუ როგორ ჩაერთო The Beatles Anthology-ის პროექტში.
„მამაჩემთან ვიყავი და მირეკავს პოლ მაკარტნი. მეუბნება: ‘გამარჯობა, კარგად ხარ? გუშინ შენს მეგობარს ველაპარაკებოდი.’ ვფიქრობ, ვის იცნობს ასეთს, მეც რომ ვიცნობ… Მერე ამბობს: ‘პატარა ბიჭია, ჯორჯ ჰარისონი. მოკლედ დიდხანს ვისაუბრეთ. The Beatles-ის ისტორიის შექმნა გვინდა და ეს კაცი შენ ხარ.’ ”
